Il-Papa Franġisku minn Dar Santa Marta Is-sigurezza li nosservaw il-kmandamenti mhux se ssalvana, insalvaw bl-umiltà li nħossu l-bżonn li nkunu mfejjqin minn Allaa. It-Tnejn, 24 ta' Marzu 2014
Is-sigurezza li nosservaw il-kmandamenti mhux se ssalvana, insalvaw bl-umiltà li nħossu l-bżonn li nkunu mfejjqin minn Alla. Dan hu fil-qosor il-ħsieb tal-omelija li l-Papa Franġisku għamel dalgħodu fid-Dar Santa Marta.
Ebda
profeta mhu milqugħ f'daru: l-omelija tal-Papa kienet mibnija fuq
dan il-kliem li Ġesù qal lil niesu, l-abitanti ta' Nażaret, li
fosthom ma setgħax iwettaq mirakli għax kienu mingħajr fidi. Ġesù
jfakkar żewġ episkodji bibliċi: il-miraklu tal-fejqan ta' Nagħman
mis-Sirja mill-lebbra fit-tempju tal-profeta Eliżew u l-laqgħa
tal-profeta Elia mal-armla ta' Sarefta ta' Sidon, li nħelset mill-karestija. Dak iż-żmien, il-lebbrużi u r-romol – spjega Franġisku – kienu nies emarġinati. Minkejja, dawn iż-żewġ emarġinati, li laqgħu lill-profeti, ġew salvati. Iżda n-nies ta' Nażaret ma aċċettawx lil Ġesù għax kienu tant “ċerti mill-fidi tagħhom”, tant żguri mill-osservanza tal-kmandamenti, li ma kellhomx bżonn salvazzjoni oħra. Dan hu d-dramm tal-osservanza tal-kmandamenti mingħajr il-fidi. Jien insalva waħdi għax kull nhar ta' Sibt immur is-sinagoga, nipprova nobdi l-kmandamenti, imma ara ma jiġix dan jgħidli li dak il-lebbruż u dik l-armla kienu aħjar minni! Dawk emarġinati!
U Ġesù jgħid: Ħares ftit, jekk int ma twarrabx fil-ġenb, jekk ma tħossokx imwarrab, ma ssalvax. Din hi l-umiltà, it-triq tal-umiltà: li tħossok tant emarġinat li teħtieġ is-salvazzjoni tal-Mulej. Hu biss isalva, mhux l-osservanza tal-preċetti. Dan m'għoġobhomx, irrabjaw u riedu jolqtluh.
L-istess rabja – ikkummenta l-Papa – għall-bidu taħkem lil Nagħman ukoll għax iħossha ridikola u umiljanti l-istedina ta' Eliżew biex jinħasel seba' darbiet fix-xmara Ġordan biex ifieq mill-lebbra. Jitlaq b'suppervja, imma, wara li kkonvinċewh il-qaddejja, jdur lura u jagħmel dak li kien qallu jagħmel il-profeta. Dak l-att ta' umiltà fejqu.
Dan hu l-messaġġ tallum, f'din it-tielet ġimgħa tar-Randan, afferma l-Papa. Jekk irridu nsalvaw irridu ngħażlu t-triq tal-umiltà. Fil-kantiku tagħha, Marija tgħid li hi hienja għax Alla ħares lejn il-verġinità tagħha, lejn tjubitha u l-ħlewwa tagħha, tant virtuwjiet li hi kellha: għax il-Mulej ħares lejn l-umiltà tal-qaddejja tiegħu, iċ-ċokon tagħha, l-umiltà.
Il-Mulej lejn dak iħares u aħna rridu nitgħallmu dak l-għerf li bih nemarġinaw ruħna biex Alla jsibna. Ma jsibnix fost is-sigurezzi tagħna, le u le. Hemmhekk ma jmurx il-Mulej. Isibna fl-emarġinazzjoni, fid-dnubiet tagħna, fl-iżbalji li nagħmlu, fil-ħtiġijiet tagħna li nkunu mfejqin spiritwalment, li nsalvaw; hemmhekk isibna l-Mulej. U din hi t-riq, tenna l-Papa, tal-umiltà.
L-umiltà nisranija mhix il-virtù li tgħid: jien ma nservi għal xejn u naħbi s-suppervja f'din l-iskuża, le u le! L-umiltà nisranija hi li ngħid il-verità: Jien midneb, midinba. Ngħid il-verità: din hi l-verità tagħna. Imma hemm l-oħra: Alla jsalvana. Imma jsalvana hemm, meta nkunu emarġinati, ma jsalvaniex fis-sigurezzi tagħna.
Nitolbu l-grazzja li jkollna dan id-dehen li nagħrfu nemarġinaw ruħna. Il-grazzja tal-umiltà biex naqilgħu is-salvazzjoni mingħand il-Mulej.
Mill-Kamra tal-Aħbarijiet ta' Radju Marija, Rabat, Malta. |