Il-Papa Franġisku minn Dar Santa Marta Il-ferħ hu s-siġill tan-nisrani anki waqt it-tbatija u t-tribulazzjonijiet. Il-Ħamis, 22 ta' Mejju 2014
Il-ferħ hu s-siġill tan-nisrani anki waqt it-tbatija u t-tribulazzjonijiet. Hekk afferma l-Papa Franġisku waqt il-quddiesa fid-Dar Santa Marta dalgħodu. Franġisku qal li nisrani mdejjaq hu ħaġa impossibbli u żied li dak li jgħallimna nħobbu u li jimlina bil-ferħ hu l-Ispirtu s-Santu Ġesù, qal il-Papa, qabel ma tela’ s-sema, tkellem dwar ħafna affarijiet imma dejjem semma’ tliet kelmiet li huma l-qofol ta’ kollox: il-paċi, l-imħabba u l-ferħ. Dwar il-ferħ kien qal li Hu ma jagħtinhiex il-paċi tad-dinja imma jtina paċi dejjiema. Dwar l-imħabba, kompla l-Papa, tant drabi qal li l-kmandament hu: “Ħobb lil Alla u lill-proxxmu” u qiesu għamel dan bħala l-kundizzjoni, kif naraw f’Mattew 25, li fuqha aħna lkoll se nkunu ġudikati.
Fil-Vanġelu tal-lum, osserva Franġisku, Ġesù jgħidilna xi ħaġa ġdida dwar l-imħabba: “Mhux biss tħobbu imma tibqgħu fl-imħabba”. Din hi l-vokazzjoni nisranija: li nibqgħu fl-imħabba t’Alla, jiġifieri li nieħdu n-nifs, ngħixu b’dak l-ossiġenu u ngħixu b’dik l-arja. Ibqgħu fl-imħabba t’Alla. U b’dan il-kliem jagħlaq id-diskors profond tiegħu dwar l-imħabba. U kif inhi l-imħabba tiegħu? “Kif Missieri ħabb lili, hekk jien ħabbejt lilkom”. Hi mħabba li ġejja mill-Missier. Ir-relazzjoni tal-imħabba bejnu u bej nil-Missier hija wkoll ir-relazzjoni ta’ mħabba bejnu u bejnna. U lilna jitlobna nibqgħu f’din l-imħabba, li ġejja mill-Missier.
Hija paċi, kompla jgħid il-Papa, li mhix ġejja mid-dinja, jagħtihielna Hu. Imħabba li mhix ġejja mid-dinja, ġejja mill-Missier. Il-Papa Franġisku kompla r-riflessjoni dwar l-eżortazzjoni ta’ Ġesù “Ibqgħu fl-imħabba tiegħi”.
Is-sinjal li aħna nibqgħu fl-imħabba ta’ Ġesù hu li aħna nħarsu l-Kmandamenti. Mhux biżżejjed insegwuhom. Meta aħna nibqgħu fl-imħabba – żied jgħid – il-Kmandamenti jissawru waħedhom mill-imħabba. L-imħabba tmexxina b’mod naturali biex inwettqu l-Kmandamenti. L-għeruq tal-imħabba jwarrdu mill-Kmandamenti. U dawn, kompla jirrifletti l-Papa, qieshom ir-rabta li tgħaqqad bħal katina lill-Missier, lil Ġesù u lilna.
Imbagħad il-Qdusija Tiegħu tkellem dwar il-ferħ. Il-ferħ, qal il-Papa, huwa s-sinjal tan-nisrani. In-nisrani mingħajr ferħ mhux nisrani jew hu marid. Mhemmx triq oħra! Is-saħħa ma tkunx f’postha, is-saħħa nisranija mhix f’sikkitha jekk ma jkunx hemm il-ferħ!
Darba għedt li hemm xi nsara li għandhom wiċċ ta’ “bżaru aħmar fil-ħall”!... Wiċċhom dejjem imġebbed! B’hekk anki ruħhom tkun l-istess u dan hu ikraħ! In-nisarni mingħajr ferħ mhux nisrani. Dan hu s-siġill tan-nisrani; il-ferħ. Anki fit-tbatijiet, fit-tribulazzjonijiet u l-istess fil-persekuzzjoni.
Jingħad li l-ewwel martri kienu jmorru għall-mewt qieshom sejrin għall-festa tat-tieġ. Dan hu l-ferħ nisrani li ħares il-paċi u jħares l-imħabba! Paċi, imħabba u ferħ: it-tlett kelmiet li jħallilna Ġesù. U min jagħmel din il-paċi, din l-imħabba, min itina l-ferħ, staqsa l-Papa? Huwa l-Ispirtu s-Santu.
Dak li aħna nsejnih f’ħajjitna! Għandi aptit nistaqsikom - imma mhux se nagħmel hekk!! – nistaqsikom: kemm minnkom titolbu lill-Ispirtu s-Santu? Tgħollux idejkom!!…… dan hu dak li aħna nsejnih f’ħajjitna! Huwa hu r-rigal, ir-rigal li jtina l-paċi, li jgħallimna nħobbu u jimlina bil-ferħ.
Fit-talba, tlabna lill-Mulej: Ħares ir-rigal tiegħek. Tlabna l-grazzja li l-Mulej jindokra l-Ispirtu s-Santu li hemm ġewwa fina. Jalla l-Mulej itina din il-grazzja: li nindukraw lill-Ispirtu s-Santu li jinsab ġewwa fina, dak l-Ispirtu li jgħallimna nħobbu, jimlina bil-ferħ u jtina l-paċi, temm ir-riflessjoni l-Papa Franġisku.
|