Il-Papa Franġisku minn Dar Santa Marta Is-salvazzjoni tiġi minn qalb umli li tafda f’Alla It-Tlieta, 16 ta’ Diċembru 2014
Alla jsalva qalb niedma filwaqt li min ma jafdax fiH jiġbed fuq l-kundanna. Dan affermah il-Papa Franġisku waqt l-omelija li għamel dalgħodu fil-kappella tad-Dar Santa Marta.
F’għajnejn Alla hija l-umiltà li ssalva lill-bniedem, is-suppervja titlef is-salvazzjoni. Il-qofol ta’ kollox hi l-qalb. Dik tal-umli hi miftuħa, taf tindem, taċċetta korrezzjoni u tafda f’Alla. Dik tas-supperv hija l-oppost: arroganti, magħluqa, ma tafx tistħi, u ma tħallix il-leħen ta’ Alla jinfidha.
Is-silta meħuda mill-Profeta Sofonija u l-Vanġelu, nebbħu l-omelija tal-Papa Franġisku dalgħodu. Fir-riflessjonijiet tiegħu ħa ż-żewġ siltiet li tipproponi l-liturġija tal-lum flimkien, u qal li t-tnejn jitkellmu dwar “ġudizzju” li minnu jiddependu s-salvazzjoni u l-kundanna.
Is-sitwazzjoni li jiddeskrivi l-Profeta Sofonija hi dik ta’ belt ribelli li, minkejja, fiha hemm grupp li nidem minn dnubietu, Dan, enfasiżża l-Papa, huwa l-poplu t’Alla li għandu t-tlett karatteristiċi tal-umiltà, tal-faqar u tal-fiduċja fil-Mulej. Imma fil-belt hemm ukoll, żied Franġisku, dawk li m’aċċettawx il-korrezzjoni, ma afdawx fil-Mulej. U xortihom hi l-kundanna.
Dawn ma jistgħux jirċievu s-salvazzjoni.
Huma magħluqin għas-salvazzjoni. “Inħalli f’nofsok poplu umli u
fqir’ jafda f’isem il-Mulej” għal ħajtu kollha. U dan għadu jiġri
sal-lum, mhux hekk? Meta naraw lill-poplu qaddis ta’ Alla, umli, li
l-għana tiegħu hija l-fidi fil-Mulej, din hi t-triq tas-salvazzjoni
u t-triq tal-Knisja, mhux hekk, staqsa l-Papa? Din hi t-triq li
għandha timxi fiha l-Knijsa, mhux l-oħra fejn ma tismax il-leħen, ma
taċċettax il-korrezzjoni u ma tafdax fil-Mulej.
Ġesù jirrakkonta din l-istorja lill-kapijiet tal-poplu u bla tlaqliq jafferma li huma ma riedux jisimgħu leħen Alla ġej minn Ġwanni u għalhekk in-nisa tat-triq u l-publikani, li emmnu lil Ġwanni, jaslu qabilhom fis-Saltna tas-Sema.
L-iskandlu mqajjem minn din
l-affermazzjoni, osserva l-Papa Franġisku, hu l-istess bħal ta’ dawk
il-ħafna Nsara li jħossu li huma puri għax għalihom biżżejjed li
tmur il-quddies u titqarben. Imma Alla għandu bżonn aktar, żied
jgħid il-Papa. Jekk ma tindimx, jekk int ma tismax lill-Mulej, ma taċċettax il-korrezzjoni u ma tafdax fiH, qalbek mhix niedma. Imma dawn l-ipokriti li jiskandaliżżaw ruħhom minħabba dak li jgħid Ġesù dwar in-nisa tat-triq u l-pubblikani, kienu jmorru għandhom bil-moħbi biex jiżvugaw il-passjonijiet tagħhom jew biex jagħmlu n-negozju – imma kollox bil-moħbi - ….. kienu puri! Imma l-Mulej dan ma jridux.
Dan il-ġudizzju jtina t-tama, assigura l-Papa Franġisku, dment li aħna jkollna l-kuraġġ li niftħu qlubna għal Alla mingħajr riżervi, u noffrulu wkoll il-lista ta’ dnubietna. Biex jispjega ruħu l-Papa semma’ l-istorja ta’ dak il-qaddis li kien jaħseb li lil Alla kien tah kollox b’ġenerożità kbira:
Dejjem kien jisma’ l-Mulej, dejjem jagħmel ir-rieda tiegħU, lill-Mulej kien itih dak li hu tiegħU: Imma int għadek ma tajtnix ħaġa waħda!. Imma l-imsejken kien tant twajjeb li jgħid: Imma Mulej x’ma tajtekx? Tajtek ħajti, naħdem mal-foqra, nagħmel il-katekeżi, naħdem ‘l hawn u ‘l hinn….. Imma hemm xi ħaġa li għadek ma tajthielix, jgħdilu l-Mulej. X’inhi, Mulej? U l-Mulej iwieġeb: dnubietek!
Meta aħna naslu li ngħidu: Mulej dawn huma dnubieti – mhux id-dnubiet ta’ dak u tal-ieħor - dnubieti…. huma tiegħi. Ħudhom int u jien insalva. Meta aħna naslu nagħmlu dan aħna nkunu dak il-poplu sabiħ, poplu umli u fqir li jafda f’isem il-Mulej. Jalla l-Mulej jaqlalna din il-grazzja, temm il-Papa Franġisku
Mill-Kamra tal-Aħbarijiet ta' Radju Marija, Rabat, Malta.
|