Il-Papa Franġisku minn Dar Santa Marta Il-korruzzjoni tas-setgħana tispiċċa biex iħallsu prezzha l-foqra. Il-Tnejn, 16 ta’ Ġunju 2014
Il-korruzzjoni tas-setgħana tispiċċa biex iħallsu prezzha l-foqra, li, minħabba r-rgħiba tal-oħrajn ma jkollhomx dak li hu meħtieġ u li għandhom dritt għalih. Hekk afferma l-Papa Franġisku fl-omelija fid-Dar Santa Marta waqt il-quddiesa ta’ dalgħodu. L-unika triq biex jingħeleb id-dnub tal-korruzzjoni hu s-servizz mogħti lill-oħrajn għax dan isaffi l-qlub.
Storja ta’ niket kbir, li minkejja li hi antika ħafna għadha mera ta’ wieħed mid-dnubiet l-aktar li naraw qrib tagħna: il-korruzzjoni. Il-Papa Franġisku għamel riflessjoni fuq il-paġna tal-Evanġelju li tqiegħed quddiemna l-liturġija tallum: l-istorja ta’ Nabot, propjetarju ta’ għalqa tad-dwieli li kienet tintiret fil-familja tiegħu.
Meta r-Re Aħab, bil-ħsieb li jkabbar il-ġnien tiegħu, jitolbu jbiegħelu l-ġnien, Nabot jirrifjuta għax ma jridx jinfired mill-wirt li ħallew missirijietu. Ir-re jeħodha bi kbira ħafna. Għalhekk martu Ġeżgħabel tħejji nassa: bil-kompliċita’ ta’ xhieda foloz tkaxkar lil Nabot quddiem il-qorti u dan jispiċċa kundannat u maqtul bit-tħaġġir.
B’hekk hi tagħti l-ġnien tant mixtieq lil żewġha li, osserva l-Papa Franġisku, jieħu kollox bil-kalma qiesu qatt ma ġara xejn. Din l-istorja, ikkummenta l-Papa, għadha sejra l-ħin kollu bejn min għandu f’idejh is-setgħa materjali jew il-poter politiku jew il-poter spiritwali.
Ħafna drabi naqraw fil-gażżetti li xi politiku ttieħed il-qorti għax b’mod maġiku sar sinjurun. Fil-qorti tressaq kap ta’ ażjenda li stagħna maġikament, jew aħjar, għax sfrutta lill-ħaddiema tiegħu.
Hemm wisq rapporti dwar prelati li saru sinjuri u ttraskuraw id-dmirijiet pastorali tagħhom biex jagħtu każ tal-poter. Hekk huma l-politiċi korrotti, in-negozjanti korrotti, in-nies tal-Knisja korrotti. Qegħdin kullimkien.
U rridu ngħidu l-verità: il-korruzzjoni hija d-dnub l-aktar qrib tagħna, id-dnub ta’ dik il-persuna li għandha awtorità fuq ħaddieħor, kemm ekonomika, kemm politika u wkoll ekkleżjastika. Ilkoll kemm aħna jkollna t-tentazzjoni għall-koruzzjoni. Huwa dnub qrib ħafna tagħna. Għax meta wieħed ikollu l-awtorità jħossu setgħan, iħossu qiesu Alla. Wara kollox, kompla jgħid il-Papa, il-korruzzjoni tiġi mis-sens ta’ sigurtà li wieħed iħoss li jkollu. Bil-ġid, bil-flus, imbagħad bis-setgħa, bil-vanità, bis-suppervja… u minn hemm …kollox anki li joqtol.
Imma, staqsa l-Papa, min iħallas għal din il-korruzzjoni? Min itik il-flus maħmuġin? Le, sostna Franġisku, min itik dawn il-flus hu s-sensal. Fil-verità l-korruzzjoni jħallas għaliha l-fqir.
Meta nitkellmu dwar il-politiċi korrotti, l-ekonomisti korrotti, min iħallas għalihom? Iħallsu l-isptarijiet neqsin mill-mediċini, il-morda li m’għandhomx kura, it-tfal mingħajr edukazzjoni. Dawn huma n-Nabot moderni li jħallsu għall-korruzzjoni tal-kbarat.
U min iħallas għall-korruzzjoni tal-prelat? Iħallsuha t-tfal li ma jafux iroddu s-salib, li ma jafux il-katekiżmu, li huma mitluqin. Iħallsuha l-morda li ħadd ma jmur jarahom, il-ħabsin li m’għandhomx attenzjoni spiritwali. Iħallusha l-foqra. Il-korruzzjoni jħallsu għaliha l-foqra materjali u l-foqra spiritwali.
Minflok, it-triq waħdanija biex noħorġu mill-korruzzjoni, biex negħelbu t-tentazzjoni, id-dnub tal-korruzzjoni, hija s-servizz. Għaliex, spjega l-Papa Franġisku, il-korruzzjoni tiġi mil-kburija, mis-suppervja filwaqt li s-servizz jumiljak, huwa l-karità umli li biha tgħin lil ħaddieħor.
Illum, temm l-omelija l-Papa, noffru din il-quddiesa għal ħafna u ħafna….. li b’ġildhom iħallsu għall-korruzzjoni, li jmantnu l-ħajja ta’ dawk il-korrotti. Dawn il-martri tal-korruzzjoni politika, tal-korruzzjoni ekonomika u tal-korruzzjoni ekkleżjastika. Nitolbu għalihom. Jalla l-Mulej iressaqna lejhom. Żgur li kien qrib ħafna ta’ Nabot fil-ħin tat-tħaġġir bħalma kien qrib ħafna ta’ Stiefnu. Jalla l-Mulej ikun qrib tagħhom u jtihom il-forza biex jimxu ‘l quddiem fix-xhieda li jagħtu bix-xhieda tagħhom infushom.
|
