Il-Papa Franġisku minn Dar Santa Marta Ma jeżistix nisrani mingħajr Knisja, nisrani li jimxi waħdu, għax Ġesù stess daħal fil-mixja tal-poplu tiegħu. Il-Ħamis, 15 ta' Mejju 2014
Ma jeżistix nisrani mingħajr Knisja, nisrani li jimxi waħdu, għax Ġesù stess daħal fil-mixja tal-poplu tiegħu: dan qalu l-Papa Franġisku waqt il-quddiesa fid-Dar Santa Marta.
Il-Papa Franġisku ħa spunt mill-ewwel qari tal-ġurnata biex jispjega li meta jħabbru lil Ġesù, l-Appostli ma jibdewx minnu imma mill-poplu. Infatti, osserva l-Papa, Ġesù ma jinftiehemx mingħajr din l-istorja, għax hu propju l-għan ewlieni tagħha, l-għan li lejh sejra u miexja l-istorja.
Għalhekk, kompla jgħid, nisrani li hu ‘l barra mill-poplu t’Alla ma jagħmilx sens. Il-kristjan mhux in-numru wieħed, imma jagħmel parti minn poplu: il-Knisja. In-nisrani mingħajr il-Knisja hi ħaġa purament idealistika, mhix reali.
Iżda n-nisrani
waħdu ma jinfthiehemx daqskemm ma nistgħux nifhmu lil Ġesù Kristu
f’iżolament. Ġesù Kristu ma waqax mis-sema qiesu eroj li ġie biex
isalvana. Le. Ġesù Kristu għandu storja. U nistgħu ngħidu, u dan
hu veru: Alla għandu storja, għax ried li jimxi magħna. U ma
nistgħux nifhmu lil Ġesù Kristu mingħajr l-istorja. B’hekk,
kristjan mingħajr storja, kristjan mingħajr poplu, kristjan mingħajr
Knisja, ma jinfthihemx. Ikun qiesu xi ħaġa tal-laboratorju, xi ħaġa
artifiċjali, ħaġa li ma tistax tagħti l-ħajja. Imbagħad, il-poplu t’Alla, żied jgħid Franġisku, jimxi ma’ wegħda. Din hi dimensjoni importanti, dejjem preżenti fil-ħajja tagħna: id-dimensjoni tal-memorja. In-nisrani hu memorja tal-istorja tal-poplu tiegħu, memorja tal-mixja li għamel il-poplu tiegħu, memorja tal-Knisja tiegħu. Il-memorja…. Il-memorja tal-passat kollu. U dan il-poplu fejn sejjer? Lejn il-wegħda definittiva. Huwa poplu li miexi lejn il-milja: poplu magħżul li għandu wegħda għall-futur u miexi lejha, lejn it-twettiq ta’ din il-wegħda. Hu għalhekk li nisrani fil-Knisja hu bniedem ta’ tama: tama fil-wegħda. Din mhix xi sorpriża li se tiġi għal għarrieda: le u le! Hi xi ħaġa oħra: hija tama. It-tama li ma tqarraqx.
Meta jħares lura, qal il-Papa, in-nisrani hu persuna ta’ memorja: jitlob il-grazzja tal-memorja, dejjem. Meta jħares ‘il quddiem huwa bniedem ta’ tama. Fil-preżent, in-nisrani jimxi t-triq ta’ Alla u jġedded il-Patt ma’ Alla. Il-ħin kollu jgħid lill-Mulej: Iva, irrid il-kmandamenti, irrid il-volontà tiegħek, irrid nimxi warajk. Hu bniedem ta’ patt u dan il-patt aħna niċċelebrawh ta’ kuljum fil-quddiesa. Għalhekk in-nisrani hu bniedem Ewkaristiku. Il-Papa temm l-omelija b’dan il-kliem:
Naħsbu, jagħmilna tajjeb naħsbu dan illum, dwar kif inhi l-identità nisranija tagħna. L-identità nisranija tagħna hi appartenenza ma’ poplu: il-Knisja. Mingħajr dan aħna m’aħniex insara. Aħna dħalna fil-Knisja bil-magħmudija: hemmhekk sirna nsara. Għaldaqstant irid ikollna d-drawwa li nitolbu l-grazzja tal-memorja, il-memorja tal-mixja li għamel il-poplu t’Alla. Anki l-memorja personali: x’għamel Alla miegħi, f’ħajti, kif mexxieni….
Nitolbu l-grazzja tat-tama. It-tama mhix ottimiżmu, le u le! Hi xi ħaġa oħra. Hija t-talba biex naqilgħu l-grazzja li kuljum inġeddu l-Patt mal-Mulej li sejħilna. Jalla l-Mulej itina dawn it-tliet grazzji li huma meħtieġa għall-identità nisranija.
Mill-Kamra tal-Aħbarijiet ta' Radju Marija, Rabat, Malta.
|
