Il-Papa Franġisku minn Dar Santa Marta In-nisrani qatt mhu wieqaf imma dejjem miexi biex jasal qabel id-diffikultà. Il-Ġimgħq, 14 ta' Frar 2014
In-nisrani qatt mhu wieqaf imma dejjem miexi biex jasal qabel id-diffikultà, afferma l-Papa Franġisku fil-quddiesa ta' dalgħodu fid-Dar Santa Marta. Fl-okkażjoni tal-festa tal-qaddisin patruni tal-Ewropa Ċirillu u Metodju, il-Qdusija Tiegħu iddeskriva l-identità tad-dixxiplu u wissa li l-Vanġelu għandu jitħabbar bil-ferħ għax bit-tgergir mhux se nagħmlu xi pjaċir lill-Mulej. Il-Papa wissa wkoll li għandna nirreżistu t-tentazzjoni li qalb l-ilpup insiru lpup aħna wkoll.
Kif għandu jkun id-dixxiplu ta' Ġesù? Il-Papa Franġisku ħa spunt mill-figuri ta' Ċirillu u Metodju biex jispjega l-identità tan-nisrani. Hu u jikkummenta l-ewwel qari meħud mill-Atti tal-Appostli qal minnufiħ li n-nisrani hu “mibgħut”. Ġesù jibgħat lid-dixxipli tiegħu u jistedinhom jibqgħu mexjin 'il quddiem. Dan ifisser, osserva, li n-nisrani hu dixxiplu ta' Kristu f'mixja, mixja li tieħdu dejjem 'il quddiem.
Ma nistgħux nimmaġinaw nisrani statiku għax in-nisrani wieqaf ikun marid, fl-identità nisranija tiegħu għandu xi marda. In-nisrani hu dixxiplu miexi, dejjem għaddej. Imma fl-aħħar, il-Mulej, (smajnih dan fis-salm), jibgħat: Morru fid-dinja kollha ħabbru l-Vanġelu. Morru. Imxu. Hekk hu: l-ewwel atteġġjament tal-identità nisranija hi l-mixja, mixja, anki jekk tiltaqa' mad-diffikultajiet, tmur lil hinn minnhom.
Dan hu dak
li ġralu Pawlu f'Antjokja tal-Pisidja, fejn kien hemm diffikultà
mal-komunità Lhudija u għalhekk marru l-pagani. Ġesù, fakkar il-Papa,
għamel stedina biex immorru f'salib it-toroq u nistiednu lil kulħadd,
lit-tajbin u lill-ħżiena. Hekk jgħid il-Vanġelu, tenna Franġisku:
anki lill-ħżiena! Kulħadd! Għalhekk in-nisrani jimxi u jekk
jiltaqa' mad-diffikultajiet, imur lil hinn minnhom biex iħabbar li
s-Saltna t'Alla hi fil-qrib.
It-tieni
aspett tal-identità tan-nisrani, żied jgħid, hi li n-nisrani irid
jibqa' dejjem ħaruf. In-nisrani, reġa' saħaq, huwa ħaruf u għandu
jżomm din l-identità. Il-Mulej jibgħatna bħan-nagħaġ qalb l-ilpup.
Imma xi ħadd jista' jissuġġerixxi li nużaw il-forza kontrihom.
Naħsbu f'David, osserva l-Papa, meta kellu jitqagħbad mal-Filistew,
riedu jlibbsuh bl-armaturi kollha ta' Sawl u ma setax jiċċaqlaq.
B'hekk, spjega Franġisku, ma baqax hu, ma baqax it-tfajjel umli, is-sempliċi
David. Fl-aħħar qabad l-iżbandola u rebaħ il-battalja. Bħall-ħrief... ma nsirux ilpup... għax kultant it-tentazzjoni tkun li naħsbu: imma dan diffiċli, dawn l-ilpup moħħhom jilħqilhom u jien se nkun makakk aktar minnhom, eh? Ħaruf. Mhux iblaħ, imma ħaruf. Ħaruf. Bl-intelliġenza ta' nisrani imma ħaruf. U għax int il-ħaruf ,Hu jiddefendik. Imma jekk inti tħossok qawwi daqs il-lupu, Hu ma jiddefendikx, iħallik waħdek u l-ilpup jiekluk ħaj.
It-tielet aspett ta' din l-identità hu l-istil tan-nisrani, jiġifieri l-ferħ. L-insara, afferma l-Papa, huma persuni li jifirħu għax jafu lill-Mulej u jwassluh. U, wissa Franġisku, in-nisrani ma jistax jimxi mingħajr ferħ, ma jistax jimxi bħall-ħaruf mingħajr ferħ. Anki fil-problemi, fid-diffikultajiet, fl-iżbalji u d-dnubiet, hemm dejjem il-ferħ ta' Ġesù li jaħfer u jgħin. Allura l-Vanġelu għandu jibqa' miexi 'l quddiem imwassal minn dawn il-ħrief mibgħuta mill-Mulej li dejjem miexi, bil-ferħ.
L-insara li r-ritmu tagħhom hu bilmod u qerriedi, li jgħixu dejjem hekk, igergru dwar kollox u bil-geddum, ma jagħmlu ebda pjaċir la lill-Mulej u lanqas lill-Knisja. Dan mhux l-istil tad-dixxiplu. Lill-insara Santu Wistin jgħidilhom: Mur, imxi, kanta u imxi! Bil-ferħ: dan hu l-istil tan-nisrani, li jħabbar il-Vanġelu bil-ferħ. Il-Mulej imbagħad jagħmel kollox. Iżda l-ħafna gdiedem, anki l-qrusa jwassluna ngħixu dak li nsejħulu kristjaneżmu mingħajr Kristu.. Is-Salib ineżża' lill-insara li hemm jibku quddiem il-qabar, bħal Madalena, imma meżżgħin mill-ferħ li sabu lill-Irxoxt.
Fil-festa taż-żewġ dixxipli nsara Ċirillu u Metodju, afferma mill-ġdid il-Papa Franġisku, il-Knisja tridna nirriflettu fuq l-identità nisranija. In-nisrani, żied jgħid, qatt ma jieqaf, hu bniedem dejjem miexi, dejjem jasal qabel id-diffikultajiet. U jimxi, tenna, bħal ħaruf. Mhux imkabbar bil-ħiliet tiegħu, hu bniedem li jimxi fil-ferħ.
Il-Mulej,
temm il-Papa, bl-interċessjoni ta' dawn iż-żewġ aħwa qaddisin,
patruni tal-Ewropa, itina l-grazzja li ngħixu ta' nsara li jimxu
bħall-ħrief u bil-ferħ. Mill-Kamra tal-Aħbarijiet ta' Radju Marija, Rabat, Malta. |