Il-Papa Franġisku minn Dar Santa Marta M’għandniex nibqgħu magħluqin fis-sistemi tagħna imma għandna ninfetħu għas-sorpriżi ta’ Alla It-Tnejn, 13 ta' Ottubru 2014
Ninfetħu għas-sorpriżi ta’ Alla u ma ningħalqux għas-sinjali taż-żmien, qal il-Papa Franġsiku fil-quddiesa ta’ dalgħodu fid-Dar Santa Marta. Il-Qdusija Tiegħu kien qed jikkummenta dak li qal Ġesù lill-imgħallmin tal-liġi u ħeġġeġ lill-fidili biex ma jibqgħux marbutin mal-ideat personali imma jimxu mal-Mulej biex isibu dejjem il-ġdid.
Ġesù jkellem lid-dutturi tal-liġi li talbuh sinjal u Hu jgħidilhom li huma nisel ħażin. Il-Papa Franġsiku beda minn dal-pass biex jirrifletti dwar it-tema tas-sorpriżi ta’ Alla.
Tant drabi, osserva, dawn l-imgħallmin talbu s-sinjali mingħand Ġesù u Hu jweġibhom li ma kellhomx ħila jaqraw is-sinjali taż-żmien. Dawn ma kinux jifhmu s-sinjali taż-żmien u riedu sinjal straordinarju li Ġesù tahom aktar tard. Għaliex ma kinux jifhmu? Għax kienu magħluqin fis-sistemi tagħhom, kienu stabbilew il-liġi tajjeb ħafna, kapulavur. Il-Lhud kollha kienu jafu x’għandhom jagħmlu u x’ma kellhomx, sa fejn setgħu jaslu. Kollox kien f’postu u huma kienu jħossuhom komdi hekk.
Għalihom, dak li kien jagħmel Ġesù kienu affarijiet strambi: imur mal-midinbin, jiekol mal-pubblikani. Lilhom dawn l-atteġġjamenti ma kinux jogħġbuhom, kienu perikolużi għax kienu jqiegħdu d-duttrina tagħhom fil-periklu, id-duttrina tal-liġi li huma, it-teoloġi, kienu ilhom jibnu sekli sħaħ.
Il-Papa qal li huma kienu għamlu l-liġi b’intenzjoni tajba, għall-imħabba u biex ikunu fidili lejn Alla. Imma kienu magħluqin hemm u kienu sempliċiment insew l-istorja. Kienu nsew li Alla mhux Alla tal-liġi imma Alla tas-sorpriżi. Min-naħa l-oħra, kompla l-Papa, anki lill-poplu tiegħu Alla ssorprendih kemm-il darba bħal meta ħelsu mill-iskjavitù tal-Eġittu.
Huma ma kinux jifhmu li Alla hu Alla tas-sorpriżi, li Alla hu dejjem ġdid, qatt ma jiċħad lilu nnifsu, qatt, imma jissorpendina dejjem. U huma ma kinux jifhmu u kienu jingħalqu f’dik is-sistema magħmula b’tant rieda tajba u kienu jitolbu lil Ġesù biex jagħtihom sinjal mingħajr ma kienu jifhmu s-sinjali li kien jagħmel Ġesù li kienu juru li l-milja taż-żmien waslet.
It-tieni, huma nsew li kienu popolu f’mixja u meta aħna nkunu mexjin dejjem insibu affarijiet ġodda, affarijiet li ma konniex nafu. Il-mixja, kompla jgħid Franġisku, mhix xi ħaġa assoltu fiha nnifisiha, hija mixja lejn il-manifestazzjoni definittiva tal-Mulej. Il-ħajja hija mixja lejn il-milja ta’ Ġesù Kristu, meta jerġa’ jiġi t-tieni darba.
Din il-ġenerazzjoni qed tfittex sinjal imma l-Mulej jgħid: mhu se jingħatalhom ebda sinjal ħlief dak ta’ Ġona, jiġifieri sinjal tal-Qawmien, tal-glorja, ta’ dik l-eskatoloġija li aħna mexjin lejha.
U dawn id-dutturi tal-liġi, tenna l-Papa, kienu magħluqin fihom infushom, ma kinux miftuħin għal Alla tas-sorpriżi, lanqas kienu jafu l-mixja u lejn fejn twassal. B’hekk, meta quddiem is-Sinedriju Ġesù jafferma li Hu l-Iben t’Alla, iċarrtu ħwejjiġhom, jiskandaliżżaw ruħhom u jgħidu li kien qed jidgħi. Is-sinjal li tahom Ġesù, afferma Franġisku, kien dagħwa għalihom. U kien għal din ir-raġuni li Ġesù jsejħilhom nisel ħażin.
Dawn, osserva l-Papa, ma kinux fehmu li l-liġi li kienu jħaddnu u jħobbu kienet xi ħaġa li trid twassal għand Ġesù Kristu. Jekk il-liġi ma twassalx għand Ġesù Kristu, hija liġi mejta. Għalhekk Ġesù jċanfarhom u jgħidilhom li huma magħluqin u mingħajr ħila li jaqraw is-sinjali taż-żmien, li mhumiex miftuħin għal Alla tas-sorpriżi.
Dan għandu jġiegħlna nirriflettu: jien marbut mal-affarijiet tiegħi, mal-ideat tiegħi, jien magħluq? Jew jien miftuħ għal Alla tas-sorpriżi? Jien bniedem wieqaf jew bniedem li qiegħed f’mixja? Jiena nemmen f’Ġesù Kristu u f’dak li għamel: miet u rxoxta u b’hekk intemmet l-istorja jew nemmen li l-mixja tibqa’ sejra lejn il-maturità, lejn il-manifestazzjoni tal-glorja tal-Mulej? Jien għandi ħila naqra s-sinjali taż-żmien u nkun fidil lejn leħen il-Mulej li jimmanifesta ruħu fihom? Nistgħu nagħmlu dawn il-mistoqsijiet lilna nfusna llum u nitolbu lill-Mulej li jtina qalb li tħobb il-liġi, għax il-liġi hija Alla, qalb li tħobb ukoll is-sorpriżi ta’ Alla u li tagħraf li din il-liġi qaddisa mhix xi ħaġa magħluqa fiha nfisha. Hija liġi li timxi, li twassal għand Ġesù, għal-laqgħa definittiva fejn se jkun hemm dan is-sinjal kbir ta’ Bin il-Bniedem, temm jgħid il-Papa Franġisku.
|
