Il-Papa Franġisku minn Dar Santa Marta Skandli qatt, maħfra dejjem, fidi soda. It-Tnejn, 10 ta' Novembru 2014
Kull nisrani, hi x’inhi l-vokazzjoni tiegħu, għandu jkun jaf jaħfer u qatt ma jagħti skandlu, għax l-iskandlu jeqred il-fidi. Il-Papa Franġisku għamel din l-affermazzjoni fil-kummenti dwar il-qari tal-quddiesa tal-lum, waqt iċ-ċelebrazzjoni tal-Ewkaristija fil-kappella tad-Dar Santa Marta.
Aħjar tintefa’ l-baħar b’ġebla tat-tħin ma’ għonqok. Ġesù jippreferi juża din ix-xbieha iebsa minflok espressjoni aktar mielsa meta jgħid lid-dixxipli x’jaħseb dwar min jagħti skandlu lill-oħrajn, speċjalment jekk dawn ikunu persuni dgħajfa. Franġisku bena l-omelija billi, mill-Vanġelu tal-ġurnata, silet tliet kelmiet li huma l-qofol tal-qari: skandlu, maħfra, fidi. Kristu jafferma bla tlaqliq: Gwaj għal min jagħti skandlu. Filwaqt li fl-ittra lil Titu, San Pawl jagħti indikazzjonijiet preċiżi dwar kif għandu jkun l-istil tal-ħajja tas-saċerdot – mhux vjolenti imma mqit – fi kliem ieħor, li ħadd ma jkollu xi jgħid fih, jiġifieri l-oppost ta’ skandlu.
Imma dan, żied il-Papa, jgħodd għall-insara kollha. L-iskandlu, kompla jgħid, ifisser li tistqarr u tgħix stil ta' ħajja “ta’ nisrani” imma l-atteġġjamenti tiegħek ikunu pagani bħal min ma jemmen f’xejn. Dan jagħti skandlu għax ikun nieqes mix-xhieda, filwaqt li l-fidi mistqarra, saħaq il-Papa, hija l-mod kif tgħix.
Meta nisrani jew nisranija, li jmorru l-knisja, fil-parroċċa, ma jgħixux dak li jemmnu jkunu qed jagħtu skandlu. Kemm-il darba smajna lil min jgħid: Jien ma mmurx il-knisja għax aħjar ngħix onestament id-dar mingħajr ma mmur milli mmur u nagħmel ċerti affarijiet bħalma jagħmlu dawk li jmorru.
L-iskandlu jiddistruġġi, jeqred il-fidi! Hu għalhekk li Ġesù hu tant iebes: Oqgħodu attenti! Oqgħodu attenti!. Jagħmlilna tajjeb inħarsu dan illum u nirrpetuh: Attenti għalina nfusna! Ilkoll kemm aħna nistgħu niskandaliżżaw. Bl-istess mod ilkoll kemm aħna għandna nkunu nafu naħfru. U naħfru “dejjem”, insista l-Papa li kien qed jirrepeti kliem Ġesù meta jistedinna biex naħfru “anki seba’ darbiet kuljum”, jekk min għamlilna tort, jitlobna l-maħfra għax jisgħob bih. Il-Papa Franġisku osserva li Ġesù jesaġera biex ifehemna kemm hi mportanti l-maħfra, għax nisrani li ma jafx jaħfer jagħti skandlu: mhux kristjan!
Aħna rridu naħfru għax aħna maħfura. Dan jinsab fit-talba tal-Missierna. Ġesù għallimulna hemm. Fil-loġika umana dan ma’ jinftiehemx. Il-loġika umana ma tridx maħfra, trid il-vendetta; twasslek għall-mibgħeda, għall-firda. Kemm familji huma mifruda għax ma jridux jaħfru lil xulxin! Ulied mifrudin mill-ġenituri tagħhom, mżżewġin bogħod minn xulxin! Importanti ħafna li naħsbu hekk: jekk jiena ma naħfirx, m’għandix, jidher li m’għandix, dritt li nkun maħfur inkella ma fhimtx xi jfisser li l-Mulej ħafirli. Din hi t-tieni kelma: il-maħfra. Allura nifhmu, kompla l-Papa, għaliex, meta semgħu dan, id-dixxipli talbu lill-Mulej biex ikattrilhom il-fidi.
Mingħajr il-fidi ma nistgħux ngħixu bla ma niskandaliżżaw, ma jirnexxilniex naħfru dejjem. Biss, irridu nħallu l-fidi ddawwalna, dik il-fidi li aħna rċevejna: il-fidi f’Missier ħanin, f’Iben li ta ħajtu għalina, fi Spirtu li jgħammar fina u jgħinna nikbru, il-fidi fil-Knisja, il-fidi fil-poplu t’Alla, mgħammed, qaddis.
Dan hu rigal, temm l-omelija l-Papa Franġisku, il-fidi hija rigal. Ħadd ma jista’ jkollu l-fidi mill-kotba jew mill-konferenzi. Il-fidi hija rigal t’Alla li tasal għandek u għalhekk l-Appostli talbu lil Ġesù: “kattar fina l-fidi!”.
|
