Il-Papa Franġisku minn Dar Santa Marta Niskopru mill-ġdid is-sens tas-sagru, il-misteru tal-preżenza reali ta’ Alla fil-Quddiesa. It-Tnejn, 10 ta' Frar 2014 Niskopru mill-ġdid is-sens tas-sagru, il-misteru tal-preżenza reali ta’ Alla fil-Quddiesa: din hija l-istedina tal-Papa Franġisku matul iċ-ċelebrazzjoni ewkaristika ta’ dalgħodu fid-Dar Santa Marta.
Il-liturġija
tal-lum kienet tittratta teofanija oħra fi żmien ir-re Salamun. Il-Mulej
niżel bħal fi sħaba fuq it-Tempju li mtela bil-glorja t’Alla. Il-Mulej
– ikkummenta l-Papa – jkellem lill-Poplu tiegħu b’ħafna modi:
permezz tal-profeti, is-saċerdoti, l-Iskrittura Mqaddsa. Iżda bit-teofaniji
jitkellem b’mod ieħor, differenti mill-Kelma: hija preżenza
differenti, aktar qrib, mingħajr medjazzjoni. Hija l-preżenza tiegħu.
Dan – spjega l-Papa – hu dak li jseħħ fiċ-ċelebrazzjoni liturġika.
Iċ-ċelebrazzjoni liturġika mhijiex att soċjali, att soċjali tajjeb;
mhijiex laqgħa ta’ dawk li jemmnu biex jitolbu flimkien. Hija xi
ħaġa oħra. Fil-liturġija, Alla huwa preżenti, iżda hija preżenza
aktar qrib. Fil-Quddiesa, fil-fatt, il-preżenza tal-Mulej hija reali,
tassew reali. Meta aħna niċċelebraw il-Quddiesa, ma nagħmlux
rappreżentazzjoni tal-Aħħar Ċena: le, mhijiex rappreżentazzjoni.
Hija xi ħaġa oħra: hija tassew l-Aħħar Ċena. Hija li ngħixu għal
darb’oħra l-Passjoni u l-mewt tal-Mulej li ssalva. Hija teofanija:
il-Mulej ikun preżenti fuq l-altar biex jiġi offrut lill-Missier
għas-salvazzjoni tad-dinja. Aħna nħossu jew ngħid: Imma issa jien
irrid immur nisma’ l-quddies. Il-quddies ma nisimgħuhiex, il-quddies
nieħdu sehem fiha, f’din it-teofanija, f’dan il-misteru tal-preżenza
tal-Mulej fostna.
Il-liturġija
hija propju li nidħlu fil-misteru ta’ Alla, li nħalluh jeħodna
fil-misteru u li nkunu fil-misteru. Hawnhekk il-Papa indirizza
lill-fidili preżenti għall-quddiesa u qal li forsi hemm min jgħid li
jmur għall-quddiesa ta’ Santa Marta biex jara lill-Papa u għax hija
parti mill-ġita turistika ta’ Ruma. Iżda kull min jieħu sehem
f’quddiesa jidħol fil-misteru. Hija din il-liturġija.
Il-Papa
fakkar li meta kien tifel ċkejken, matul it-tħejjija għall-Ewwel
Tqarbina kien hemm innu li kien jgħid li l-artal huwa mħares mill-anġli
biex ifisser is-sens tal-glorja t’Alla, tal-ispazju t’Alla,
taż-żmien t’Alla. U meta waqt il-provi l-katekisti kienu jeħdulhom
l-ostji, kienu jgħidu lit-tfal: dawn mhumiex dawk li se tirċievu
fil-quddiesa, dawn ma jiswew xejn għax mhumiex ikkonsagrati.
Għalhekk meta niċċelebraw il-liturġija huwa li jkollna l-disponibbiltà
li nidħlu fil-misteru t’Alla, fl-ispazju tiegħu, fiż-żmien tiegħu u
nintelqu f’dan il-misteru.
|