Il-Papa Franġisku minn Dar Santa Marta Dan hu s-sawm li jrid il-Mulej! Sawm li jagħti każ u jippreokkupa ruħu mill-ħajja ta' ħuħ, li ma jistħix mill-laħam ta' ħuħ. Il-Ġimgħa, 7 ta' Marzu 2014
Jien nistħi mill-laħam ta' ħija, ta' oħti? Hija waħda mill-mistoqsijiet li għamel il-Papa Franġisku waqt l-omelija fid-Dar Santa Marta dalgħodu. Il-Papa wera li l-ħajja tal-fidi hi marbuta strettament ma' ħajja ta' karità lejn il-foqra, li mingħajra kull ma' nistqarru jkun biss ipokrisija.
Il-kristjaneżmu mhux regola mingħajr ruħ, xi ktieb ta' regoli tli jgħid x'inhuma l-osservanzi formali għal nies li jidhru bil-wiċċ formali tal-ipokrisija biex jaħbu qalb vojta mill-karità. Il-kristjaneżimu hu l-istess “laħam” ta' Kristu li jmil mingħajr mistħija fuq min qed isofri.
Biex jispjega din il-kontrapożizzjoni l-Papa Franġisku kkwota d-djalogu li nsibu fil-Vanġelu tallum bejn Ġesù u d-dutturi tal-liġi li kkritikaw lid-dixxipli għax ma kienux qed isumu bħalhom u bħall-fariżej, li fil-fatt kienu jsumu spiss ħafna. Il-fatt hu, osserva l-Papa, li d-dutturi kienu bidlu l-osservanza tal Kmandamenti u rrendewha formalità biex b'hekk bidlu l-ħajja reliġjuża f'waħda etika u nsew l-għeruq, jiġifieri l-istorja tas-salvazzjoni, tas-sejħa u tal-alleanza.
Kienu reċevew mingħand il-Mulej l-imħabba ta' Missier, irċevew mingħand il-Mulej l-identità ta' poplu u mbagħad ittrasformawha f'etika u rrifjutaw ir-rigal ta' mħabba. Dawn in-nies ipokriti huma persuni tajbin, jagħmlu dak kollu li għandhom jagħmlu. Jidhru tajbin! Jimxu mal-etika, imma b'etika mingħajr tjubija għax tilfu s-sens ta' appartenenza ma' poplu! Is-salvazzjoni, il-Mulej itiha fi ħdan poplu, fl-appartenenza ma' poplu.
Madankollu,
osserva l-Papa, diġà il-Profeta iżaija – fil-pass li rajna fl-ewwel
qari – kien iddeskriva ċar x'għandu jkun is-sawm skont il-viżjoni ta'
Alla: li ninħallu mill-irbit mal-ħażen, li neħilsu lill-imjassrin,
imma wkoll li naqsmu l-ħobż ma' min hu mġewwaħ, nilqgħu f'darna lil
min m'għandux saqaf, inlibbsu li min hu għeri.
L-akbar
att ta' qdusija tagħna jinsab propju fil-laħam ta' ħuna u fil-laħam
ta' Ġesù Kristu. L-att ta' qdusija tallum, tagħna, hawnhekk fuq
l-altar, mhux is-sawm ipokrita: hu li nistħux mill-laħam ta' Kristu
li jiġi hawn illum! Hu l-misteru tal-Ġisem u d-Demm ta' Kristu. Hu
li mmorru naqsmu l-ħobż mal-imġewwaħ, li nikkuraw lill-morda,
lill-anzjani, lil dawk li ma jistgħu jtuna xejn lura: dak ifisser li
ma nistħux mill-laħam tal-oħrajn!
Dan
ifisser, afferma l-Papa Franġisku, li s-sawm l-aktar diffiċli hu s-sawm
tat-tjubija, is-sawm bħal dak tas-Samaritan it-Tajjeb li jmil fuq
il-bniedem miġrugħ, u mhux dak tas-saċerdot li jħares lejn l-istess
imsejken imma jibqa' għaddej, forsi minħabba l-biża' li jitniġġes.
Għalhekk, din hija l-proposta tal-Knisja llum: jien nistħi mill-laħam
ta' ħija, ta' oħti? Meta nagħti l-elemożina, nitfa' l-munita biex ma mmissx id il-fqir? U fil-każ li mmissha, niġbed idi lura mill-ewwel? Meta jien nagħti l-elemożina inħares f'għajnejn ħija, oħti? Meta naf li persuna hi marida mmur naraha? Insellmilha bit-tenerezza? Hemm sinjal li forsi jista' jgħinna: hija mistoqsija – naf inżiegħel bil-morda, bl-anzjani, bit-tfal jew forsi tlift is-sens tat-tgħannieq? Dawn l-ipokriti ma kienux jafu jgħannqu! Kienu nsewh dan.....
M'għandniex nistħu, temm il-Papa, mil-laħam ta' ħutna: hu l-istess
laħam tagħna! Aħna għad irridu nkunu ġudikati fuq dak li nagħmlu
ma' dan ħuna, ma' din oħtna!
|
