Il-Papa Franġisku minn Dar Santa Marta In-nisrani ma jibżax iħammeġ idejh minħabba f’min hu mbiegħed. Il-Ħamis, 6 ta’ Novembru 2014
Il-veru nisrani ma jibżax iħammeġ idejh mal-midneb, ma jibżax jirriskja anki l-fama tiegħu, għax għandu l-qalb ta’ Alla li ma jrid lil ħadd jintilef. Dan qalu l-Papa Franġisku waqt l-omelija tal-quddiesa ta’ dalgħodu fid-Dar Santa Marta. Il-Papa tkellem dwar iż-żewġ parabboli tan-nagħġa mitlufa u tal-munita mitlufa. Il-Fariżej u l-iskribi jiskandaliżżaw ruħhom għax Ġesù jilqa’ lill-midinbin u jiekol magħhom.
Għal dawk in-nies dak kien veru skandlu, osserva Franġisku li kkummenta: min jaf kieku dak iż-żmien kienu jeżistu l-ġurnali! Imma Ġesù għalhekk ġie, biex ifittex lil dawk li kienu tbegħedu mill-Mulej.
Dawn iż-żewġ parabboli juruna kif inhi l-qalb ta’ Alla. Alla ma jieqafx. Alla ma jasalx biss sa ċertu punt, imma jibqa’ sejjer sal-aħħar, sal-limiti. Ma jieqafx f’nofs it-triq tas-salvazzjoni qiesu qed jgħid: jien għamilt ħilti kollha, issa problema tagħhom . Hu jibqa’ għaddej, joħroġ, jinżel fil-kamp tal-battalja.
Imma l-iskribi u l-Fariżej jieqfu nofs triq. Lilhom kien jimpurtahom li jkun hemm bilanċ favorevoli bejn id-dħul u l-ħruġ u b’hekk kienu jserħu rashom. Iva, tlift tliet muniti, għaxar nagħġiet, imma qlajt ħafna. Dan mhux parti mill-mentalità ta’ Alla. Alla mhux negozjant. Alla hu Missier u biex isalva ma jieqafx, jibqa’ sejjer sal-aħħar, ‘l hinn mill-limiti. Din hi l-imħabba t’Alla. Kemm hu ta’ niket, osserva l-Papa, ragħaj li jibqa’ nofs triq. Hu ta’ niket li ragħaj jiftaħ il-bieb tal-Knisja u jibqa’ hemm jistenna. Hu ta’ niket in-nisrani li ġewwa fih, f’qalbu, ma jħossx il-ħtieġa li jmur jirrakkonta lill-oħrajn li l-Mulej huwa twajjeb. Kemm hi perversa l-qalb ta’ min jaħseb li hu ġust bħall-iskribi u l-Fariżej!
Dawn ma jridux iħammġu jdejhom mal-midinbin. Niftakruha din, niftakru kif kienu jaħsbuha u x’kienu jgħidu: Kieku dan kien profeta kien ikun jaf li din hi midinba. Id-disprezz. L-ewwel kienu jużaw lin-nies imbagħad jiddisprezzawhom. Meta r-ragħaj jibqa’ f’nofs it-triq, hija telfa, qal il-Papa. Ir-ragħaj għandu jkollu l-qalb ta’ Alla u jibqa’ sejjer sal-limitu, għax ma jrid lil ħadd jintilef.
Il-veru ragħaj, il-veru nisrani, għandu fih dan iż-żelu: ħadd m’għandu jintilef. U għalhekk, ma jibżax iħammeġ idejh. Ma jibżax. Imur fejn għandu jmur. Jirriskja ħajtu, jirriskja l-fama tiegħu, jirriskja li jitlef il-kumdità li jkollu, l-istatus tiegħu u jitlef anki l-karriera ekkleżjastika, basta jkun ragħaj tajjeb.
L-insara għandhom ikunu hekk huma wkoll. Faċli ħafna tikkundannna lill-oħrajn kif kienu jagħmlu dawn, tikkundanna lill-midinbin, lill-pubblikani. Ħafifa ħafna din imma mhux attitudni nisranija, mhux hekk? Mhix attitudni ta’ ulied Alla. Iben Alla jibqa’ sejjer sal-limiti, jagħti ħajtu. Hekk għamel Ġesù għall-oħrajn. Ma jistax jibqa’ kalm, jagħti kaz tiegħu nnifsu, tal-kumditajiet tiegħu, tal-fama, tas-sigurtà tiegħu.
Ftakruha din: le għar-rgħajja tan-nofs triq, le u qatt! Le għal-insara tan-nofs triq, qatt! Niftakru f’dak li għamel Ġesù. Ir-ragħaj tajjeb, in-nisrani tajjeb, joħroġ dejjem, dejjem jinsab iterraq, joħroġ barra minnu nnifsu u jmur lejn Alla bit-talb, bl-adorazzjoni. Joħroġ. Imur lejn l-oħrajn biex iwasslilhom il-messaġġ tas-salvazzjoni. Ir-ragħaj tajjeb, in-nisrani tajjeb jafu x’inhi t-tenerezza.
Dawn l-iskribi u l-Fariżej ma kienux jafu x’inhi t-tenerezza, ma kienux jafu xi jfisser li tgħabbi n-nagħġa fuq spallejk, bit-tenerezza, u teħodha lura mal-bqija tal-merħla, f’postha. Dawn in-nies ma jafux x’inhu l-ferħ.
In-Nisrani u r-ragħaj tan-nofs triq forsi jaf x’inhu d-divertiment, il-ħajja trankwilla, iħoss ċertu paċi…… imma l-ferħ, dak il-ferħ li hemm fis-sema, dak il-ferħ li jiġi minn Alla, dak il-ferħ li jnixxi mill-qalb ta’ Missier li jmur biex isalva!? Smajt l-ilmenti ta’ Iżraeliti u nżilt fil-kamp tal-battalja. Dan hu tant sabiħ: li ma nibżgħux li jgħidu fuqna meta mmorru nfittxu lil ħutna li huma mbiegħdin mill-Mulej. Nitolbu din il-grazzja għal kull wieħed u waħda minna u anki għal Ommna l-Knisja Mqaddsa.
|
