Il-Papa Franġisku minn Dar Santa Marta Il-Knisja mhix istituzzjoni riġida, il-Knisja hija ħielsa. il-Ħamis, 5 ta’ Ġunju 2014
Il-Knisja mhix istituzzjoni riġida, il-Knisja hija ħielsa. Hekk qal il-Papa Franġisku waqt il-quddiesa ta’ dalgħodu fid-Dar Santa Marta. Fl-omelija, il-Papa għamel twissija dwar tliet gruppi ta’ nies li jippretendu li huma nsara u sejħilhom “l-uniformisti”, “l-alternattivisti” u l-vantaġġisti”. Għal dawn in-nies, osserva l-Papa, il-Knisja mhix darhom imma qegħdin fiha b’kera.
Ġesù jitlob għall-Knisja u jitlob lill-Missier biex fost id-dixxipli tiegħu ma jkunx hemm firdiet jew ġlied. Il-Papa Franġisku ħa spunt mill-Evanġelju tal-ġurnata biex jitkellem dwar l-għaqda fi ħdan il-Knisja.
Hemm ħafna, osserva, li jgħidu li huma fil-Knisja imma qegħdin b’sieq waħda fiha u l-oħra għadha ma daħlitx. B’hekk jidhrilhom li jistgħu jkunu “fiż-żewġ postijiet”: ġewwa u barra. Għal dawn in-nies wissa l-Papa Franġisku, il-Knisja mhix darhom, ma jħossuhiex tagħhom. Għal dawn il-Knisja qegħda għandhom b’kera. Hemm gruppi li “jikru” lill-Knisja, imma ma jqiesuhiex bħala darhom. Il-Papa qasam lil dawn in-nies fi tliet gruppi ta’ nsara: dawk li jridu li fil-Knisja kulħadd ikun l-istess. B’logħob bil-kliem, qal b’daħka l-Papa, nistgħu nsejħulhom “uniformisti”.
L-uniformità, ir-riġidità. Huma iebsin! M’għandhomx dik il-libertà li jagħti l-Ispirtu s-Santu. U jħawdu dak li għallem Ġesù fl-Evanġelju mad-duttrina tagħhom, id-duttrina tal-ugwaljanza. Ġesù qatt ma ried li l-Knisja tiegħu tkun daqshekk riġida. Qatt! Minħabba l-atteġġjamenti tagħhom, dawn in-nies ma jidħlux fil-Knisja. Jgħidu li huma nsara, Kattoliċi, imma l-atteġġjamenti riġidi tagħhom ibegħeduhom mill-Knisja.
Grupp ieħor, kompla l-Papa, hu magħmul minn dawk li dejjem għandhom l-idea tagħhom, li ma jridux li tkun bħal dik tal-knisja, għandhom alternattiva. Dawn huma l-“alternattivisti”.
Jien nidħol fil-Knisja imma b’din l-idea, b’din l-ideoloġija. B’hekk huma ma jkunux jiffurmaw parti sħiħa mill-Knisja. Anki dawn għandhom sieq waħda barra. Anki għal dawn il-Knisja mhix darhom, mhix tagħhom. Sa ċertu punt huma kerrejja fil-Knisja. Fil-bidu tal-evanġeliżżazzjoni wkoll kien hemm minn dawn. Naħsbu ftit fl-injostiċi li l-Appostlu Ġwanni jsawwat bil-goff. Jgħidu … iva… iva aħna kattoliċi imma b’dawn l-ideat. Bl-alternattiva. Ma jaqsmux mal-Knisja dak is-sens li jħossuha tagħhom.
U t-tielet grupp, kompla jgħid, hu magħmul minn dawk li jgħidu li huma nsara imma ma jidħlux fil-Knisja minn qalbhom, huma “l-vantaġġisti”, dawk li jfittxu l-vantaġġi u…. jmorru l-Knisja, imma għall-vantaġġ personali u jispiċċaw biex jibdew jagħmlu n-negozju fil-Knisja.
Dawn “in-negozjanti” nafuhom tajjeb! Anki dawn kienu jeżistu sa mill-bidu. Niftakru fi Xmun is-Saħħar, naħsbu f’Ananija u f’Safira. Dawn kienu japprofittaw ruħhom mill-Knisja għall-interessi tagħhom. U lil dawn rajniehom fil-komunitajiet parrokkjali jew djoċesani, fil-kongregazzjonijiet reliġjużi, fost il-benefatturi tal-Knisja. Hemm tant minnhom, eh? Jiddandnu li huma benefatturi tal-Knisja u, minn wara l-mejda, ikunu qed imexxu l-interessi tagħhom. Dawn ukoll ma jħossux il-Knisja bħala omm, bħala tagħhom. Ġesù jgħid: “Le, il-Knisja mhix riġida, hija waħda, unika: il-Knisja hi libera!”
Fil-Knisja, kompla jirrifletti l-Papa, hemm tant kariżmi, hemm diversità kbira ta’ persuni u ta’ doni tal-Ispirtu s-Santu! Il-Mulej jgħidilna, kompla Franġisku: “Jekk trid tidħol fil-Knisja, agħmel hekk għall-imħabba, biex tagħti qalbek u mhux biex tinnegozja għall-qligħ tiegħek”. Il-Knisja, irrimarka, mhix dar għall-kiri, il-Knisja hija dar biex tgħix fiha, u tqisha bħala ommok.
Il-Papa jifhem li dan mhux faċli għax it-tentazzjonijiet huma kbar. Imma, l-għaqda tal-Knisja, l-għaqda fid-diversità, fil-libertà u fil-ġenerożità, jagħtiha biss l-Ispirtu s-Santu. Dan hu x-xogħol tiegħu. L-Ispirtu s-Santu, żied jgħid, inissel l-armonija fil-Knisja. L-għaqda tal-Knisja hija l-armonija.
Ilkoll, kompla josserva, aħna differenti, m’aħniex l-istess, għall-grazzja t’Alla, inkella nkunu fl-infern! Ilkoll kemm aħna msejħin biex inkunu doċli għall-Ispirtu s-Santu. Propju din id-doċilità hija l-virtù li teħlisna milli nkunu riġidi, li nkunu “alternattivisti”, li nkunu “vantaġġisiti” jew negozjanti fil-Knisja: id-doċilità għall-Ispirtu s-Santu. Hija propju din id-doċilità li tittrasforma l-Knisja u minn dar tal-kiri tagħmilna bnedmin li jħossuha d-dar tagħhom..
Jalla l-Mulej, temm il-Qdusija Tiegħu, jibgħatilna l-ispirtu s-Santu u jalla dan inissel l-armonija fil-komunitajiet tagħna – fil-komunitajiet parrokkjali, djoċesani, fil-komunitajiet tal-movimenti – jalla jkun l-Ispirtu li jnissel din l-armonija għax kif kien jgħid wieħed mis-Santi Padri tal-Knisja: l-Ispirtu nnifsu huwa l-armonija.
|