Il-Papa Franġisku minn Dar Santa Marta Anki Alla jibki: il-biki tiegħu hu bħal dak ta' missier li jħobb lil uliedu u ma jiċħadhom qatt anki jekk ikunu ribelli. It-Tlieta, 4 ta' Frar 2014 Anki Alla jibki: il-biki tiegħu hu bħal dak ta' missier li jħobb lil uliedu u ma jiċħadhom qatt anki jekk ikunu ribelli, jibqa' jistennihom dejjem. Din l-affermazzjoni għamilha l-Papa Franġisku waqt l-omelija tal-quddiesa li ppresjieda fid-Dar Santa Marta dalgħodu.
Il-qari tal-lum jippreżentalna l-figura ta' żewġ missirijiet: ir-Re David li jibki l-mewt ta' ibnu ribell Absalom, u Ġajru, kap tas-sinagoga li jitlob lil Ġesù jfejjaqlu lil bintu. Il-Papa sġjega l-biki ta' David mal-aħbar tal-qtil ta' ibnu, minkejja li dan kien qed jiġġieled kontra missieru biex joħodlu r-renju. L-eżerċtu ta' David rebaħ, imma lir-re ma kinitx tinteressaħ ir-rebħa, kien qed jistenna lil ibnu! Kien jimpurtah biss minn ibnu! Kien re, kien kap tal-pajjiż, imma kien missier! B'hekk, meta waslet l-aħbar tat-tmiem ta' ibnu ħa xokk u beda jitriegħed, tela fil-kamra ta' fuq jibki. Hu u tiela beda jgħid: Ibni, ibni Absalom! Aħjar mitt jien minflokok! Absalom, ibni, ibni! Din hi l-qalb ta' missier li qatt ma jiċħad lil ibnu. Kien brigant, kien għadu, imma dejjem baqa' ibni!
David darbtejn beka minħabba uliedu: did-darba, u meta kien se jmutlu t-tifel li twieled mill-adulterju. Anki dik id-darba kien sâm u għamel il-penitenza biex isalva l-ħajja ta' ibnu. Kien missier!. Il-missier l-ieħor li naqraw dwaru llum kien il-kap tas-sinagoga, persuna importanti, afferma l-Papa, imma li quddiem il-marda ta' bintu ma jistħix jinxteħet f'riġlejn Ġesù u jgħidlu: binti qed tmut, ejja qiegħed idejk fuqha biex jgħaddilha u tgħix! Ma jistħix, ma jimpurtahx minn dak li se jgħidu l-oħrajn għax hu missier. David u Ġajru huma żewġ missirijiet. Għalihom l-aktar importanti kienu l-iben, it-tifla! Xejn aktar, dawk kienu l-unika ħaġa importanti! Dan iwassal ħsiebna fuq l-ewwel ħaġa li ngħidu lil Alla fil-Kredu: Nemmen f'Alla l-Missier. Iġiegħlna naħsbu dwar il-paternità ta' Alla. Imma Alla hekk hu. Alla hekk hu magħna.
Imma,
tgħiduli, Alla ma jibkix! Kif le? Niftakru f'Ġesù meta beka x'ħin
ra 'l Ġerusalemm. Gerusalemm, Ġerusalemm, kemm-il darba ridt niġbor
'l uliedek bħalma l-qroqqa tiġbor 'il-flieles taħt ġwenħajha. Alla
jibki! Ġesù beka minħabba fina. U dak il-biki ta' Ġesù hu propju
x-xbieha tal-biki tal-Missier li jridna lkoll miegħu.
Hu Missier bħal dak li kien jistenna l-iben il-ħali li telaq bil-flus kollha u bil-wirt tiegħu kollu. Imma missieru baqa' jistennih, kuljum, u rah ġej mill-bogħod. Dak hu Alla tagħna, osserva l-Papa, hu l-paternità tagħna – dik tal-missirijiet tal-familja, bħall-paternità spiritwali tal-isqfijiet u s-saċerdoti. Bħal din għandha tkun: il-missier għandu bħal dilka li tkun ġejja minn ibnu: ma jistax jifhem lilu nnifsu mingħajr ibnu! U minħabba f'hekk għandu bżonn lil ibnu: jistennih, iħobbu, ifittxu, jaħfirlu, iridu qribu, tant qrib bħalma l-qroqqa trid lill-flieles tagħha.
Ejjew immoru lura d-dar b'dawn iż-żewġ ikoni: David
li jibki, u l-ieħor, kap tas-sinagoga, li jinxteħet quddiem Ġesù
mingħajr biża' li jista' jsir iż-żuffjett tal-oħrajn minħabba l-mistħija.
Fin-nofs kien hemm iż-żewġ uliedhom: it-tifel u t-tifla. U ma' dawn
iż-żewġ ikoni ngħidu: nemmen f'Alla l-Missier... u nitolbu
lill-Ispirtu s-Santu, għax hu biss l-Ispirtu s-Santu li jgħallimna
ngħidu: Abbà, Missier! Din hija grazzja li nistgħu nsejħu bil-qalb
lil Alla: Missier. Hija grazzja tal-Ispirtu s-Santu. Nitolbuhielu,
temm il-Papa. |