Il-Papa Franġisku minn Dar Santa Marta Fedeltà, perseveranza u fekondità. Dawn huma t-tliet karatteristiċi tal-imħabba li Ġesù għandu lejn il-Knisja, l-Għarusa tiegħu. Il-Tnejn, 2 ta' Ġunju 2014
Fedeltà, perseveranza u fekondità. Dawn huma t-tliet karatteristiċi tal-imħabba li Ġesù għandu lejn il-Knisja, l-Għarusa tiegħu. U dawn huma wkoll il-karatteristiċi ta’ żwieġ nisrani awtentiku. Hekk afferma l-Papa Franġisku dalgħodu fl-omelija li għamel waqt il-quddiesa li ppresjieda fid-Dar Santa Marta.
Ħmistax-il koppja, ħmistax-il storja ta’ żwieġ differenti minn xulxin, ta’ familji mibdijin 25, 50, 60 sena ilu quddiem altar, u li quddiem l-altar tal-Papa Franġisku reġgħu inġabru biex flimkien jirringrazzjaw lil Alla talli waslu sa hawn.
Kienet xena mhux tas-soltu fil-kappellla tad-Dar Santa Marta iżda li offriet lill-Papa okkażjoni biex jirrifletti fuq it-tliet pilastri, li fil-viżjoni tal-fidi għandhom isostnu l-imħabba bejn il-miżżewġin: il-fedeltà, il-perseveranza, il-fekondità. Il-mudell li rridu nħarsu lejh spjega l-Papa, huma “tliet imħabbiet” ta’ Ġesù lejn il-Missier, lejn Ommu, lejn il-Knisja. L-imħabba tiegħu lejn il-Knisja hija kbira, afferma l-Papa Franġisku: “Ġesù żżewweġ lill-Knisja għall-imħabba”. Hija l-Għarusa sabiħa tiegħu: sabiħa, qaddisa, midinba, imma jħobbha xorta waħda. U l-mod kif iħobbha juri t-tliet karatterstiċi ta’ din l-imħabba.
Hija mħabba fidilia; hija mħabba perseveranti, ma jgħeja qatt iħobb il-Knisja tiegħu; hija mħabba għammiela. Hija mħabba fidila! Ġesù hu fidil! F’waħda mill-ittri tiegħu San Pawl jgħid: Jekk int tistqarr lil Kristu, Hu jistqarr lilek quddiem il-Missier; jekk int tiċħad lil Kristu, Hu jiċħad lilek; jekk int ma tibqax fidil lejn Kristu, Hu jibqa’ fidil għax ma jistax jiċħad lilu nnifsu! Il-fedeltà hija propju l-ħajja tal-imħabba ta’ Ġesù. U l-imħabba ta’ Ġesù lejn il-Knisja tiegħu hija fidila. Din il-fedelà hija bħal dawl fuq iż-żwieġ. Il-fedeltà fl-imħabba. Dejjem.
Fedeltà dejjem imma ma tgħeja qatt u tibqa’ tippersevera. L-istess bħall-imħabba ta’ Ġesù lejn l-Għarusa tiegħu. Ġesù kemm-il darba jaħfrilha l-Knisja u bl-istess mod, afferma l-Papa Franġisku, anki fi ħdan il-koppja, xi drabi trid tintalab il-maħfra biex b’hekk l-imħabba fiż-żwieġ tibqa’ tikber.
Il-ħajja taż-żwieġ trid tkun perseveranti, trid tibqa’ perseveranti. Għax jekk isir bil-maqlub, l-imħabba ma tistax tibqa’ tikber. Il-perseveranza fl-imħabba: fil-mumenti sbieħ u fil-mumenti koroħ, meta hemm il-problemi: il-problemi bit-tfal, il-problemi ekonomiċi, problemi hawn u problemi hemm. Imma l-imħabba tippersevera, timxi ‘l quddiem, dejjem tfittex li ssolvi s-sitwazzjoni biex issalva l-familja. Meta jkunu perseveranti, il-mara u r-raġel iqumu filgħodu u flimkien imexxu l-familja.
It-tielet karatteristika: il-fekondità. L-imħabba ta’ Ġesù, osserva l-Papa Franġisku, isseddaq il-Knisja b’ulied ġodda, bil-Magħmudijiet, u l-Knisja tikber b’din il-fekondità nuzjali. Fiż-żwieġ, din il-fekondità xi drabi tista titqiegħed taħt prova, meta ma jaslux tfal jew meta jkunu morda. Waqt dawn il-provi, enfasizza l-Papa, hemm koppji li jħarsu lejn Ġesù u jirċievu l-qawwa tal-fekondità li Ġesù għandu għall-Knisja tiegħu. Filwaqt li min-naħa l-oħra hemm affarijiet li lil Ġesù ma jogħġbuhx, jiġifieri ż-żwiġijiet li jibqgħu bla tfal b’għażla.
Dawn il-koppji li ma jridux tfal, li jridu jgħixu mingħajr ma jnisslu…. Din il-kultura tal-kumdità li għaxar snin ilu kkonvinċietna: Aħjar ma jkollokx tfal! Aħjar! B’hekk tkun tista’ tgawdi d-dinja, tmur għall-vaganzi, jista’ jkollok villa fil-kampanja… tibqa’ trankwill…. Forsi aħjar, aktar komdu, jkollok kelb, xi żewġt iqtates u l-imħabba tmur lejn il-qtates jew lejn il-kelb. Minnu dan jew le? Rajtuh dan b’għajnejkom jew le? U fl-aħħar dan iż-żwieġ jasal għax-xjuħija fis-solitudni, bit-togħma qarsa tas-solitudni kiefra. Mhux żwieġ għammiel, ma jagħmilx dak li Ġesù jagħmel mal-Knisja tiegħu meta jagħmilha għammiela, temm il-Papa.
|