Il-Papa Franġisku minn Dar Santa Marta Il-Papa Franġisku beka minħabba l-insara li sfaw imsallbin fis-Sirja. Il-Ġimgħa, 2 ta' Mejju 2014
Il-Papa Franġisku beka minħabba l-insara li sfaw imsallbin fis-Sirja. Dan qalu dalgħodu waqt il-quddiesa fid-Dar Santa Marta hu u jfakkar dak li ġara f'pajjiż mhux nisrani. Franġisku kien qed jikkummenta dwar il-qari mill-Atti tal-Appostli li jirakkonta li l-Appostli kienu ġew imsawta mis-Sanhedrin. Il-Papa nnota li anki fid-dinja tallum għad hawn min jaħseb li hu “awtorità fuq il-kuxjenza” u f'ċerti pajjiżi għadek tista' tispiċċa l-ħabs għax għandek kopja tal-Bibbja jew tilbes salib.
Is-swat mis-Sanhedrin għall-Papa Franġisku fisser tlett ikoni: l-imħabba ta' Ġesù għall-poplu tiegħu, l-attenzjoni tiegħu għall-problemi tal-poplu. Il-Mulej ma joqgħodx jgħodd in-numru tan-nies li jimxu warajh, qatt ma jgħaddilu minn moħħu li jagħmel ċensiment biex jara jekk il-Knisja kibritx.... le! Hu jipprietka, iħobb, jakkumpanja, jimxi fil-mgħodijiet mal-bniedem, bil-manswetudni u bl-umiltà. Hu jitkellem bl-awtorità, jiġifieri bis-setgħa tal-imħabba.
It-tieni ikona hija l-għira tal-awtoritajiet reliġjużi ta' dak iż-żmien. Ma setgħux iniżżluha li n-nies jimxu wara Ġesù! Ma setgħux jaċċettawha! Kienu għajjurin. Din hi attitudni ħażina għall-aħħar. Il-ġelożija, l-għira... u aħna nafu li missier l-għira hu x-xitan. Kien minħabba l-għira tiegħu li daħal il-ħażen fid-dinja. Il-Papa Franġisku kompla jgħid li dawk in-nies kienu jafu min kien Ġesù: kienu jafu sew! Kienu l-istess nies li ħallsu lill-għassiesa biex jgħidu li d-dixxipli kienu serqu l-ġisem ta' Ġesù!
Kienu ħallsu biex isikktu l-verità. Kultant, il-ħażen f'ċerti nies jista' jkun estrem! Għax meta nħallsu biex naħbu l-verità nkunu qed inwettqu ħażen morali kbir. U kien għalhekk li n-nies kienu jafuhom sewwa u ma kinux imorru warajhom, imma l-poplu kellu jitollerahom għax kienu nies ta' awtorità: l-awtorità tal-kult, l-awtorità tad-dixxiplina ekkleżjali ta' żmienhom, l-awtorità fuq il-poplu........ u l-poplu kellu jaċċettahom.
Ġesù kien qal li huma kienu jgħabbu lill-poplu b'piżijiet kbar u kienu jġiegħeluh iġorr it-tagħbija fuq spallejh. Dawn in-nies ma setgħux iġerrħu l-manswetudni ta' Ġesù, ma setgħux jaċċettaw il-manswetudni tal-Vanġelu. U minħabba l-għira u minħabba l-mibgħeda jħallsu l-flus.
Waqt il-laqgħa tas-Sinedriju kien hemm raġel għaref, Gamaljel, li talab lill-mexxejja reliġjużi biex jeħilsu lill-Appostli. B'hekk, kompla l-Papa, naraw l-ewwel żewġ ikoni: Ġesù li jħossu mqanqal għax jara l-poplu mingħajr ragħaj u l-awtoritajiet reliġjużi.....
Dawn, bil-manuvri politiċi tagħhom ikomplu jiddominaw fuq il-poplu. Għalhekk iġibu lill-Appsotli quddiemhom, wara li dar-raġel għaref kien tkellem, isawtuhom u jordnawlhom biex ma jitkellmux f'isem Ġesù. Imbagħad ħelsuhom. “Jeħtieġ li nagħmlu xi ħaġa, insawtuhom waħda sew u nibgħatuhom 'l hemm!” Inġustizzja, imma xorta waħda għamluha. Huma kienu “l-imgħallmin tal-kuxjenza” u dehrilhom li kellhom is-setgħa li jagħmlu dak li għamlu. Imgħallmin tal-kuxjenza..... kemm hawn minnhom fid-dinja tallum ukoll!
F'dal punt il-Papa qal: bkejt meta rajt ir-rapport tal-insara li sfaw imsallbin f'ċertu pajjiż li mhux nisrani. Sal-lum, kompla josserva, hemm nies li joqtlu u jippersegwitaw f'isem Alla. Għadna sal-lum naraw ħafna li, bħall-Apposlti, jifirħu li jsofru l-umiljazzjonijiet f'isem Kristu. Din hi t-tielet ikona tallum: Il-ferħ tax-xhieda.
L-ewwel ikona: Ġesù man-nies, imħabbtu, it-triq li għallimna, li għandna nimxu fiha. It-tieni ikona: l-ipokrisija ta' dawn il-mexxejja reliġjużi tal-poplu, li kienu jħallu lill-poplu mjassar bil-ħafna kmandamenti, b'din il-legalità kiesħa u iebsa u li kienu wkoll ħallsu biex jaħbu l-verità.
It-tielet ikona: il-ferħ tal-martri nsara, il-ferħ li ħassew tant ħutna li tul l-istorja, dan il-ferħ li bih huma ngħaddu mal-bosta li kienu denji li jsofru d-diżunur f'isem Kristu. U llum għad hawn ħafna minnhom! Aħsbu ftit kif f'xi pajjiżi, tista' tispiċċa l-ħabs għax ikollok il-Bibbja fuqek. Ma tistax tilbes salib għax teħel multa. Imma l-qalb tithenna. It-tliet ikoni: inħarsu lejhom illum. Din hi parti mill-istorja tas-salvazzjoni tagħna.
Mill-Kamra tal-Aħbarijiet ta' Radju Marija, Rabat, Malta. |
