Qabel xejn nixtieq irroddilkom ħajr tal-istedina biex niċċelebra dil-quddiesa magħkom il-ħaddiema. Ġesù ġej, Hu jaf xi jfisser ix-xogħol, jifhimna tajjeb. Jifhimna tajjeb ħafna. U nixtieq ngħid ukoll talba għall-għażiż tagħna Sandro (Mariotti). Ilbieraħ ħalliena missieru. Missieru kien jaħdem hawn, fil-Vatikan. Mar kif imorru l-ġusti.. kien flimkien ma’ sħabu ħdejn il-baħar u.....
Nitolbu għal missier Sandro u għal Sandro
Issa nixtieq ngħidilkom xi ħaġa dwar l-Evanġelju. Ġesù ra’ raġel jismu Mattew, bilqiegħda wara l-bank tat-taxxi. Kien pubblikan. Il-ġudizzju dwar dawn in-nies kien wieħed mill-agħar għax kienu ....., kienu jġegħelu lin-nies iħallsu t-taxxi u l-flus jibgħatuhom lir-Rumani. U xi ftit minnhom kienu jitfugħhom f’buthom. Kienu jtuhom lir-Rumani; kienu jbiegħu il-libertà tal-patrija tagħhom u għalhekk kienu nies mistmella. Kien tradituri tal-patrija. Ġesù sejjaħlu. Rah u sejjaħlu. Ejja warajja. Ġesù għażel appostlu...., minn fost dawk in-nies, l-agħar li seta’ jagħżel. Imbagħad, dan Mattew, mistieden għall pranzu, kien mimli ferħ.
Qabel, meta kont noqgħod f’Via della Scrofa, kont nieħu gost, issa ma nistax, immur (fil-knisja) ta’ San Luigi dei Francesi biex noqgħod mammira ‘l Caravaggio, Il-Konverżjoni ta’ Mattew, hu, marbut għal kollox mal-flus (b’sebgħu miftuħ) u Ġesù b’sebgħu jipponta lejh. Hu qalbu mal-flus. U Ġesù jagħżel lilu. Jistieden liċ-ċorma kollha għall-pranzu, lit-tradituri tal-patrija, lill-pubblikani. Meta raw dan, il-Fariżej, li kienu jaħsbu li huma ġusti, bdew jiġġudikaw u jgħidu: “Imma kif l-Imgħallem tagħkom jinsab f’kumpanija bħal din?” Ġesù jgħid: “Jien ma ġejtx insejjaħ lill-ġusti, imma lill-midibnin”.
Dan lili jtini faraġ kbir, għax nifhem li Ġesù ġie għalija. Għax aħna lkoll midinbin. Ilkoll. Ilkoll għandna din il-lawrija. Aħna lawrijati. Kull wieħed u waħda minna nafu fejn tinsab is-saħħa tad-dnub tagħna, tad-dgħufija tagħna. Qabel xejn irridu nagħrfu dan: ħadd minna, ilkoll kemm aħna li ninsabu hawn, ma jista’ jgħid: “Jien minix midneb”. Il-Fariżej hekk kienu jgħidu. Kienu suppervi, vanitużi, kienu jaħsbu li huma aħjar mill-oħrajn. Iżda aħna lkoll midinbin. Dan hu t-timbru tagħna u huwa wkoll possibiltà biex biha niġbdu lejna lil Ġesù. Ġesù jiġi lejna,... jiġi għandi, jiġi għandi għax jiena midneb.
Għalhekk ġie Ġesù, għall-midinbin, mhux għall-ġusti. Dawn ma jeħtiġuhx. Ġesù qal: “Mhux min hu f’saħħtu jeħtieġ it-tabib imma min hu marid, morru xandru xi tfisser il-ħniena, jien ħniena rrid u mhux sagrifiċċji”. Għax jien ma ġejtx biex isejjaħ lill-ġusti, imma lill-midinbin”.
Meta naqra dan inħoss li Ġesù qiegħed isejjaħli, u lkoll kemm aħna nistgħu ngħidu l-istess: Ġesù ġie għalija. Kull wieħed u waħda minna....
Dan hu l-faraġ tagħna u l-fiduċja tagħna: li Hu jaħfer dejjem, Hu jfejjaq ir-ruħ, dejjem. Dejjem. “Imma jien dgħajjef u nerġa’ naqa’...”: se jkun Ġesù li jqajjmek, li jfejqek, dejjem (....) Dan hu l-faraġ tagħna, Ġesù ġie għalija, biex itini l-qawwa, biex jhennini, biex jikkalma l-kuxjena tiegħi. Tibżgħux. Fil-mumenti koroħ, meta bniedem iħoss il-piż ta’ tant affarijiet li għamilna, tant żelqiet fil-ħajja, tant affarijiet, u jħoss il-piż... Ġesù jħobbni għaliex jien kif jien.
Qed jiġini f’moħħi episodju mill-ħajja ta’ qaddis kbir, San Ġlormu, li kellu karattru żorr ħafna u kien jagħmel ħiltu biex ikun manswet, imma dak il-karattru tiegħu... kien mid-Dalmazja u n-nies t’hemmhekk huma ta’ karattru qawwi... Kien irnexxilu jirbaħ lilu nnifsu u lill-Mulej kien joffrilu tant affarijiet, tant ħidma, u kien jitlob lill-Mulej: “Xi trid minni?” – “Għadek ma tajtnix kollox” – “Imma, Mulej, tajtek dan, din, l-oħra...” – “Jonqos xi ħaġa” – “X’jonqos?” – “Tini dnubietek”.
Sabiħa nisimgħuha din: “Tini dnubietek, id-dgħifijiet tiegħek, jien infejjaq, int ibqa’ miexi”.
Illum l-ewwel Ġimgħa tax-Xahar, naħsbu fil-Qalb ta’ Ġesù, jalla jgħinna nifhmu dil-ħaġa hekk sabiħa, bil-qalb mimlija ħniena li tgħid biss: “Tini d-dgħufijiet tiegħek, tini dnubietek, jien naħfer kollox”. Ġesù kollox jaħfer, jaħfer dejjem.
Jalla dan ikun il-ferħ, il-ferħ tagħna.
Miġjub għall-Malti mit-Taljan minn Joe Huber