Għeżież ħuti, il-jum it-tajjeb! Qednara li intom kuraġġużi ħafna li ġejtu fil-pjazza f’din is-sħana kollha. Complimenti!
L-Evanġelju tal-lum jgħidilna li l-Appostli, wara l-esperjenza tal-missjoni, reġgħu lura kuntenti imma għajjenin. U Ġesù, li fehemhom, irid jagħtihom ftit tas-serħan; għalhekk jitwarrab magħhom, f’post għal kwiet biex ikunu jistgħu jistrieħu ftit (cfr Mark 6,31). «Iżda ħafna rawhom telqin u fehmu.... u waslu qabilhom» (vers 32). F’dal-punt l-Evanġelista joffrilna immaġni ta’ Ġesù li hi ta’ intensità partikolari, għax hi “ritratt” biex ngħidu hekk, ta’ għajnejh u tislet is-sentimenti li kellu f’qalbu, u l-Evanġelista jgħid: «Wara li niżel mid-dgħajsa, Hu ra folla kbira, ġietu ħniena minnhom għax kienu qieshom nagħaġ mingħajr ragħaj, u qabad jgħallimhom ħafna ħwejjeġ» (vers 34).
Ejjew nerġgħu naqbdu t-tliet verbi ta’ dan ir-ritratt: ra, ġietu ħniena, għallem. Nistgħu nsejħulhom il-verbi tar-ragħaj. Ra, ġietu ħniena, għallem. L-ewwel u tieni, ra u ġietu ħniena insibuhom marbutin mal-atteġġjament ta’ Ġesù: infatti, ħarstu mhix dik ta’ soċjologu jew ta’ fotografu għax Hu dejjem iħares “bl-għajnejn tal-qalb”. Dawn iż-żewġ verbi ra u ġietu ħniena jinkwadraw lil Ġesù bħala r-Ragħaj it-Tajjeb. Anki l-kumpassjoni tiegħu mhix biss sentiment uman, imma hi kommozzjoni tal-Messija li fiH saret laħam it-tenerezza ta’ Alla. Din il-kumpassjoni titnissel mix-xewqa ta’ Ġesù li jitma’ ‘l-folla bil-ħobż tal-Kelma tiegħu, jiġfieri li jgħallem il-Kelma t’Alla lin-nies. Ġesù jara, Ġesù tiġih ħniena, Ġesù jgħallimna. Sabiħ dan!
U jiena tlabt lill-Mulej biex l-Ispirtu ta’ Ġesù, ir-Ragħaj it-Tajjeb, dan l-Ispirtu, jmexxini tul il-Vjaġġ Appsotolikuli għamilt dawn l-aħħar jiem fl-Amerika Latina u li ppermettili nżur l-Ekwador, il-Bolivja u l-Paragwaj. Niżżi ħajr lill-Mulej minn qiegħ qalbi għal dan ir-rigal. Irrodd ħajr lill-popli ta’ dawn it-tliet pajjiżi għal-laqgħa li tawni u għall-kollaborazzjoni. B’imħabba kbira nirringrazzja lil ħuti l-Isqfijiet, lis-saċerdoti, lill-persuni konsagrati u lill-popolazzjonijiet kollha għall-ħerqa li biha huma ħadu sehem. Flimkien ma’ dawn ħuti faħħart il-Mulej għall-għeġubijiet li wettaq fil-Poplu t’Alla li miexi f’dawk l-artijiet, għall-fidi li ħeġġet u għada tħeġġeġ il-ħajja u l-kultura tagħhom. U raddejnilu ħajr ukoll għas-sbuħija naturali li biha huma mogħnijin dawn il-pajjiżi. Il-kontinent Latino-amerikan għandu potenzjalitajiet umani u spiritwali kbar, iħares il-valuri Nsara li għandhom għeruq fondi, imma għaddej ukoll minn ħafna problemi soċjali u ekonomiċi gravi. Biex tagħti sehemha għas-soluzzjoni tagħhom, il-Knisja hija impenjata biex timmobilta l-forzi spiritwali u morali tal-komunitajiet tagħha, billi tikkollabora mal-kull settur tas-soċjetà. Quddiem l-isfidi kbar li t-tħabbira tal-Evanġelju trid tħabbat wiċċha magħhom, jien stedinthom biex jixorbu minn Kristu l-Mulej il-grazzja li ssalva u li tagħti l-qawwa fl-impenn tax-xhieda Nisranija, biex jiżviluppaw it-tixrid tal-Kelma t’Alla, sabiex ir-reliġjożità qawwija ta’ dawk il-popolazzjonijiet tkun dejjem xhieda fidila tal-Evanġelju.
Lill-interċessjoni materna tal-Verġni Marija, li l-Amerika Latina kollha tqim bħala patruna taħt it-titlu tas-Sinjura Tagħna ta’ Guadalupe, nerħi l-frott ta’ dan il-vjaġġ appostoliku li ma jintesiex.
Wara l-Angelus:
Għeżież ħuti,
Insellmilkom minn qabli Rumani u pellegrini!
Insellem partikolarment liż-żgħażagħ tad-djoċesi ta’ Pamplona y Tuleda fi Spanja.
Insellem lis-sorijiet tal-Familja Mqaddsa ta’ Nażaret miġburin f’Ruma għall-kapitlu Ġenerali; l-orkestra ta’ Offanengo-Casalbuttano; il-kori ta’ Vigo Cavedine (Trento); liż-żagħażagħ volontarji li jaħdmu fil-kunvent ta’ Arco di Trento, liż-żagħażagħ minn Meana Sardo u lil dawk li qed jieħdu sehem fil-btala organiżżataa mill-INPS ta’ Pomezia; liż-żagħażagħ tal-Azzjoni Kattolika minn Mellaredo u Rivale (Padova).
Nixtieq lil kulħadd il-Ħadd it-tajjeb. Nitlobkom biex jekk jogħġobkom titolbu għalija, tinsewx. Il-pranzu t-tajjeb u arrivederci!
Miġjub għall-Malti mit-Taljan minn Joe Huber