Omelija tas-Sibt, 25 ta’ Mejju 2013.-
Il-Papa Franġisku jeżorta biex niftħu l-bibien għall-fidi.
Min javviċina l-Knisja għandu jsib il-bieb miftuħ u mhux nies li jippruvaw jikkkontrollawlu l-fidi. Dan qalu l-Papa Franġisku waqt l-omelija tal-quddiesa li ċċelebra nhar is-Sibt, 25 ta’ Mejju 2013, fid-Dar Santa Marta. Il-Vanġelu tal-ġurnata jirrakkonta li Ġesù jċanfar lid-dixxipli li ma ridux lit-tfal jersqu biex iberikom il-Mulej. Imma Ġesù jgħannaqhom, ibushom, imellishom, kollha. Ġesù għajjien u d-dixxipli jridu jwaqqfuhom. Imma xi kultant anki Ġesù jagħdab u jgħidilhom: ħalluhom jiġu għandi, iżżommuhomx għax is-Saltna t’Alla hi għal min hu bħalhom. Il-fidi tal-Poplu t’Alla – osserva l-Papa – hija fidi sempliċi, fidi li forsi ma fihiex wisq teoloġija, imma hija mirfuda minn teoloġija interna li mhix żbaljata għax warajha hemm l-Ispirtu Qaddis.
Il-Papa semma’ l-Konċilji tal-Vatikan l-1 u t-2 fejn jingħad li “l-poplu qaddis t’Alla.. ma jistax jiżbalja fejn jidħol it-twemmin (Lumen Gentium). U biex jispjega din l-affermazzjoni teoloġika żied jgħid: Jekk trid tkun taf min hi Marija mur għand teologu u jgħidlek eżatt min hi. Imma jekk trid tkun taf kif tħobb lil Marija mur għand il-Poplu t’Alla li jgħallem aħjar. Il-Poplu t’Alla, kompla l-Papa, dejjem jitlob xi ħaġa li tkun aktar qrib ta’ Ġesù u kultant ikun insistenti mhux ħażin! Imma din xorta waħda hi l-insistenza ta’ min jemmen. Niftakar darba, meta kont ħiereġ mill-belt ta’ Salta, nhar il-festa tal-qaddis patrun, kien hemm mara umli li talbet il-barka ta’ qassis. Il-qassis wieġeb: tajjeb imma int kont għall-quddiesa u spjegalha t-teoloġija kollha tal-barkiet fil-knisja. Grazzi dun, iva dun, wieġbet il-mara. Meta telaq l-ewwel saċerdot, il-mara daret fuq ieħor u talbitu jberikha. Kull ma kien qalilha l-ewwel wieħed ma ħalla ebda effett fuqha għax hi kella ħtieġa oħra: kella l-ħtieġa li tintmiss mill-Mulej. Din hi l-fidi li għandna dejjem infittxu, din hi l-fidi li tiġi mill-Ispirtu Qaddis. Aħna għandna niffaċilitawha, inkabbruha, ngħinuha tikber. Il-Papa semma’ wkoll l-istorja tal-għama ta’ Ġeriko li kien imċanfar mid-dixxipli għax beda jgħajjat: “Ġesù, Iben David, ikollok ħniena minni” Il-Vanġelu jgħid li ma riduhx jgħajjat. Huma ma riduhx imma hu beda jgħajjat aktar. Għaliex? Għax kellu l-fidi f’Ġesù! L-Ispirtu s-Santu kien nissillu l-fidi f’qalbu. U huma qalu: Le, ma tistax tagħmel hekk! Ma tgħajjatx lill-Mulej għax il-protokol ma jippermettihulekx. Dan hu t-Tieni Persuna tat-Trinità! Ara x’int tagħmel! Mhux hekk kienu qieshom qed jgħidulu? U aħsbu fl-attitudni ta’ bosta Nsara: Aħsbu fl-Insara t-tajbin, ta’ rieda tajba. Naħsbu fis-segretarju ta’ xi parroċċa...bonġu, il-lejla t-tajba.. aħna t-tnejn - għarus u għarusa - irridu niżżewġu! U minflok jgħidilhom kemm hi ħaġa sabiħa jisimgħu: Għandkom ċertifikat tal-Magħmudija .. mela tajjeb! U b’hekk isibu bieb magħluq.... meta dan in-Nisrani u din in-Nisranija għandhom il-ħila jiftħu bieb u jirringrazzjaw lil Alla għal żwieġ ġdid.
Ħafna drabi aħna nikkontrollaw il-fidi minflok niffaċilitawha fin-nies. U dejjem tibqa’ t-tentazzjoni, kompla l-Papa, li nippruvaw nieħdu pusses ta’ Alla li nidħlu minfloku!
U żied storja oħra: Aħsbu dwar mara mhux miżżewġa li tmur il-knisja, fil-parroċċa, u tgħid: Nixtieq ngħammed lit-tarbija tiegħi. U dan-Nisrani....dan-Nisrani jwieġeb: Le, għax mintix miżżewġa!
Araw ftit: din it-tfajla li kellha l-kuraġġ iżżomm it-tqala u ma tibgħatx lil binha għand il-Ħallieq! Xinhu dan? Bieb magħluq. Dn mhux żelu, hu mbiegħed minn Alla! Ma jiftaħx bibien.
Allura meta nkunu f’dit-triq, meta jkollna din l-attitudni, ma nkunux qed nagħmlu ġid lill-poplu, lill-Poplu t’Alla. Ġesù waqqaf seba’ sagramenti u bl-attitudni tagħna aħna nkunu qed noħolqu t-tmien wieħed: is-sagrament tad-dwana pastorali!
Ġesù jagħdab meta jara dawn l-affarijiet – qal il-Papa – għax
dawk li jbatu huma l-poplu fidil tiegħu, il-poplu li hu l-aktar li jħobb.
Illum naħsbu f’Ġesù li dejjem iridna aktar qrib tiegħu,
naħsbu dwar il-Poplu Qaddis t’Alla, poplu sempliċi, li jrid joqrob lejn Ġesù
u naħsbu dwar tant Insara li jiżbaljaw u minflok jiftħu l-bieb tar-rieda
tajba, jagħlquh.
Għalhekk nitolbu lill-Mulej biex dawk kollha li jersqu lejn il-Knisja jsibu l-bibien miftuħin, isibu l-bibien miftuħin biex jiltaqgħu ma’ din l-imħabba ta’ Ġesù. Nitolbu din il-grazzja.
Ħajr lill-Kamra tal-Aħbarijiet ta’ Radju Marija.