Indirizz mill-Eċċellenza Tiegħu
Mons. Pawl Cremona O.P.
Arċisqof ta’ Malta
Lill-Qdusija Tiegħu l-Papa Benedittu XVI
Fl-Okkażjoni
taż-Żjara Pastorali tiegħu
Il-GROTTA TA’ SAN PAWL, IR-RABAT – MALTA
17 ta’ April 2010.
Santità,
Wara li ntlaqajt uffiċjalment mill-Eċċellenza Tiegħu l- President tar-Repubblika
ta’ Malta, f’isem il-poplu Malti, jien nagħtik merħba uffiċjalment f’isem id-djoċesi
ta’ Malta u d-djoċesi ta’ Għawdex. Santità, hu unur kbir u esperjenza spiritwali
unika li jkollna lilek fostna, il-fidili ta’ dawn iż-żewġ gżejjer. Fuq nota
personali, flimkien mat-tfal li kantawlek quddiem il-Palazz Presidenzjali,
nixtieq nawguralek fl-okkażjoni ta’ Għeluq Sninek.
Santità, issa qiegħed f’nofs il-merħla tiegħek u din il-merħla tagħtik merħba
bħala r-ragħaj tagħha f’isem il-Mulej Ġesù Kristu.
Il-Grotta ta’ San Pawl tfakkarna fil-qagħda tal-Appostlu Pawlu fil-gżira tagħna
u wkoll, skont it-tradizzjoni, fil-post fejn kien miżmum il-ħabs. Il-fidi tagħna
ġiet mhux biss minn Pawlu nawfragu iżda wkoll minn Pawlu priġunier. Il-Predikazzjoni
tal-Kelma waslitilna permezz ta’ San Pawl, imlibbes il-faqar, imma riflessa
fil-qawwa spiritwali ġewwinija ta’ dak li ppridkaha. Dan hu wkoll parti mill-wirt
tal-Fidi tagħna.
Il-fatt li l-Provvidenza Divina wasslet lil Pawlu biex jiġi fil-gżejjer tagħna
jibqa’ għajn ta’ stagħġib għalina. Illum nirringrazzjaw lill-Provvidenza Divina
u lill-Qdusija Tiegħek li għażilt li żżurna.
Aħna għadna nistagħġbu għaliex il-miraklu tal-lifgħa sar fl-ewwel stadju
tal-qagħda ta’ Pawlu fil-gżira, bħala sinjal li hu kellu jakkumpanja dan
il-miraklu bil-predikazzjoni tiegħu. Bl-istess mod, il-Qdusija Tiegħek tiġi
għandna b’missjoni speċifika tixxiebah. Aħna dalwaqt sa nisimgħu l-ewwel messaġġ
tiegħek ftit sigħat biss wara li llandjajt fuq Gżiritna. Santità, aħna qed
nistennew il-kelma tiegħek biex twettaqna fil-fidi tagħna.
Elf disa’ mija u ħamsin sena ilu, il-Maltin kellhom bil-mod il-mod jiskopru minn
kien San Pawl. Wara l-miraklu, “biddlu l-ħsieb u bdew jgħidu li kien xi alla” (Atti
28,6). Santità, fi qlubna aħna diġà nafu minn int. Int ir-Ragħaj Suprem tagħna
li tirrappreżenta lill-Mulej Ġesù Kristu fostna.
Dak iż-żmien il-Maltin kellhom jiskopru bil-mod il-mod in-natura eżatta tal-fidi
li Pawlu kien qed jippriedka. Huma tgħallmu dwar Sidna Ġesù Kristu u l-Evanġelju
tiegħu. Santità, illum aħna lesti biex nirċievu l-Kelma mingħandek li diġà
għanejt lill-Knisja bir-riflessjonijiet teoloġiċi tiegħek u issa, bħala Papa,
bil-Maġisteru tiegħek.
Kif hemm miktub fl-Atti tal-Appostli, meta l-Maltin irċevew il-Kelma mingħand
Pawlu, il-komunità li kienet pagana saret Komunità Nisranija mimlija fil-qawwa
ta’ Pentekoste. Pawlu ħalla f’idejhom biex irawmu l-Kelma ħalli ż-żerriegħa ta’
din il-Kelma li hu żara’ f’dawn il-gżejjer tikber u tagħmel il-frott. Bis-smigħ
tal-Kelma, kull wieħed min-nies tal-gżira li aċċetta l-Kelma sar jew saret
iż-żerriegħa li kellha tinżara’ u tikber. Meta San Pawl ħalla l-gżira hu fada
f’idejn il-Komunità Maltija t-tkabbir taż-żerriegħa li hu kien żara’. Dan hu dak
li huma għamlu b’fedeltà. Din il-fedeltà, u dik ta’ ġenerazzjonijiet oħra ta’
Maltin li ġew wara, ippermettew li tkun trażmessa lilna mingħajr qtugħ ta’ xejn.
Tul is-snin, ħafna Maltin ħassew is-sejħa li jimitaw lil San Pawl anke fis-sejħa
Missjunarja tiegħu. Illum, f’din il-ġrajja tassew partikolari, l-istedina
speċjali tagħna kienet lil dawk ħutna, rġiel u nisa, li ħallew il-gżejjer tagħna
biex ixerrdu l-Aħbar it-Tajba mal-ħames kontinenti kollha. Illum, ħafna mijiet
ta’ isqfijiet, saċerdoti, membri ta’ Istituti ta’ Ħajja Kkonsagrata u persuni
lajċi, miżżewġin u singoli, minn dawn il-gżejjer huma preżenża ħajja
tal-Universalità tal-Knisja f’dawn il-pajjiżi.
Santità, aħna qed nistennew b’ħerqa kbira l-messaġġ tiegħek, biex twettaqna
fil-fidi tagħna u wkoll biex tiggwidana f’din il-missjoni ġdida li naqsmu l-fidi
tagħna ma’ oħrajn li tbiegħdu mill-Knisja anke f’dawn il-Gżejjer.
+ Paul Cremona O.P.
Arċisqof ta’ Malta